Ekologiese piramide

in Wikipedia, die vrye ensiklopedie
Spring na: navigasie, soek

Ekologiese piramides is voorstellings van voedselkettings in 'n ekostelsel wat dikwels deur ekoloë saamgestel word. In só 'n piramide vorm die produseerders die basis, terwyl kleiner wordende opeenvolgende trofiese vlakle hoër op tot by die bopunt van die piramide gerangskik word. Die produseerders is dus die meeste, die primêre verbruikers minder, die sekondêre verbruikers nog minder, en so voorts. Daar word tussen drie tipes ekologiese piramides onderskei, naamlik die getalpiramide, die biomassapiramide, en die energiepiramide.

Getalpiramide[wysig]

Die getalpiramide dui die werklike getal individue op elke trofiese vlak aan, byvoorbeeld daar is gewoonlik baie meer produseerders (plante) as herbivore (primêre verbruikers) en meer herbivore as predatore, en so voorts. In die natuur kom daar egter baie variasies van die getalpiramide voor. By hierdie soort piramide word ook nie die grootte van die individu in ag geneem nie. So kan die produseerders mikroskopiese diatome (fitoplankton) of groot geelhoutbome wees.

Biomassapiramide[wysig]

Die biomassapiramide dui die totale massa van die organismes op elke trofiese vlak van die piramide aan. Ook die kwantitatiewe verwantskappe of die produksie ("oes") van 'n bepaalde gebied word duidelik aangetoon, byvoorbeeld die totale massa van die predatore op een trofiese vlak is gewoonlik minder as dié van die herbivore op die vorige vlak. In hierdie piramide word daar weer geen aandag gegee aan getalle nie, terwyl die grootte van die organisme oorbeklemtoon word.

Energiepiramide[wysig]

Die energiepiramide dui die hoeveelheid energie op elke trofiese vlak van die piramide aan. Die verlies van energie tydens die oordrag van die een vlak na 'n ander kan nie voorkom word nie. Die produseerders in 'n gemeenskap beskik dus oor meer energie as die primêre verbruikers van die volgende trofiese vlak, terwyl die herbivore oor meer energie as die karnivore van die volgende vlak beskik. Hierdie verlies van beskikbare energie van die een vlak na 'n ander bring dus vanself die perfekte piramidevorm na vore. Van die drie piramides gee die energiepiramide dus die duidelikste geheelbeeld van die onderlinge verwantskappe in 'n bepaalde gemeenskap.