Golgi-apparaat

in Wikipedia, die vrye ensiklopedie
Spring na: navigasie, soek

Die Golgi-apparaat is 'n organel wat in 1898 deur Camillo Golgi beskryf is, en waaroor baie menings gewissel is. Daar is nog nooit heeltemal eenstemmigheid oor die presiese funksie daarvan verkry nie. Die Golgi-Apparaat van 'n sel bestaan uit 'n aantal diktiosome. Elke diktiosoom is 'n gekonsentreerde stelsel van membraanbegrensde buisies wat naastenby parallel met mekaar is en gewoonlik in die nabyheid van die selkern aangetref word. Die membrane is aaneenlopend met die endoplasmiese retikulum (ER) en is veral volop in selle met 'n sekreterende funksie. In sulke selle produseer die Golgi-apparaat gedurig vloeistofgevulde blasies wat in die rigting van die selmembraan beweeg, daarmee versmelt en sodoende hul inhoud vrystel. Sommige navorsers meen dat die Golgi-apparaat ook 'n rol in die vorming van nuwe endoplasmiese retikulum speel. Dit help blykbaar ook met die vorming van die dwarswand tydens seldeling.