Love Parade

in Wikipedia, die vrye ensiklopedie
Spring na: navigasie, soek
Die amptelike kenteken van die Love Parade
Love Parade 2006 by die Siegessäule in Berlyn
Verhoog op die Berliner Platz tydens die Love Parade 2007 in Essen

Die Love Parade (in Duits dikwels ook gespel as Loveparade of Love-Parade) was 'n dansfees wat vanaf 1989 jaarliks (behalwe vir 2004, 2005 en 2009) plaasgevind het en met altesaam sowat twaalf miljoen besoekers sedert sy stigting die grootste dansfees ter wêreld was. Die fees is tussen 1989 en 2006 in Berlyn gehou en in 2007, 2008 en 2010 op verskeie plekke in die Ruhrgebied (deelstaat Noordryn-Wesfale).

Die 19de Love Parade op 24 Julie 2010 in Duisburg is deur 'n stormloop oorskadu waarin twintig mense dood en meer as 500 beseer is. Die ongeluk het wêreldwyd opslae gemaak. Die laaste organiseerder van die Love Parade, Rainer Schaller, het bekend gemaak dat daar in die toekoms geen Love Parade meer sal plaasvind nie.

Geskiedenis[wysig]

Die eerste Love Parade is in die somer van 1989 deur Matthias Roeingh (meer bekend onder sy kunstenaarsnaam Dr. Motte) in samewerking met sy vriendin Danielle de Picciotto in die lewe geroep. Die dansfees, waaraan aanvanklik net 150 mense deelgeneem het, het mettertyd tot 'n reusebyeenkoms van tegnomusiek-geesdriftiges gegroei en in 1999 sowat 1,5 miljoen besoekers gelok. Ná 'n onderbreking in 2004 en 2005 en die ontwikkeling van 'n nuwe konsep is die dansfees in 2006 weer met meer as een miljoen deelnemers in Berlyn gehou. Die volgende Love Parade sou op 7 Julie 2007 weereens in die Duitse hoofstad plaasvind, maar in Februarie is dit deur die organiseerder, die Loveparade Berlin GmbH, gekanselleer aangesien dit nog nie deur die Berlynse owerheid goedgekeur was nie.

Stede dwarsoor Europa het meegeding om Berlyn as gasheerstad te vervang, en op 15 Junie 2007 is bekend gemaak dat die Love Parade vir 'n tydperk van vyf jaar in die Ruhrgebied gehou sou word. Die volgende Love Parades het op 25 Augustus 2007 in Essen (1,2 miljoen besoekers), op 19 Julie 2008 in Dortmund (1,6 miljoen besoekers) en op 24 Julie 2010 in Duisburg (tussen 200 000 en 1,4 miljoen besoekers[1]) plaasgevind. In 2011 sou Gelsenkirchen die gasheerstad wees.

Verwysings[wysig]