Manish Dayal
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
| Manish Dayal | |
| |
Manish Dayal in 2014
| |
| Geboortenaam | Manish Sudhir Patel |
|---|---|
| Geboorte | 17 Junie 1983 Orangeburg, Suid-Carolina |
| Nasionaliteit |  Verenigde State
|
| Ouers | Hema en Sudhir Patel |
| Beroep(e) | akteur |
| Aktiewe jare | 2005–hede |
| Internet-rolprentdatabasis-profiel | |
Manish Dayal (gebore Manish Patel, Orangeburg, Suid-Carolina, 17 Junie 1983) is ’n Amerikaanse TV- en rolprentakteur wat veral bekend is vir sy herhalende rol as Raj Kher in 90210 en hoofrol in die rolprent The Hundred Foot Journey (2014).
Lewensloop[wysig | wysig bron]
Dayal se ouers, Hema en Sudhir Patel, kom uit Gujarat in Indië. Hy is die derde van vier kinders. Nadat hy sy skoolopleiding aan die Episkopale skool Heathwood Hall voltooi het, het hy verder studeer aan die George Washington-universiteit, waar hy in 2005 afgestudeer het. Hy het in 'n sakerigting studeer omdat, hoewel hy van kleintyd af gek was oor die rolprentwese en dit sy loopbaan wou maak, hy van plan was om 'n regisseur of vervaardiger te word, nie 'n akteur nie.[1] Daarna het hy na New York verhuis om ’n loopbaan in film en televisie na te streef. Vyf jaar later, in 2010, het hy na Kalifornië verhuis waar hy vandag nog woon. Hy gebruik sy oupa se voornaam, Dayal, as sy verhoognaam.
Loopbaan[wysig | wysig bron]
Dayal se loopbaan het begin met verskynings in nasionale reklameflitse vir McDonald's, Windows, Nintendo en Domino's Pizza. In 2008 het hy 'n hoofrol vertolk in The New Group se Off-Broadway-produksie Rafta, Rafta, waarvan die speelvak twee maal verleng is. Hy het ’n klein rol vertolk in The Sorcerer's Apprentice en in Paula van der Oest se Domino Effect. Ná ’n gasrol in CSI: Las Vegas het Dayal die rol vertolk van Hal, ’n rekenaarontleder, in die AMC-reeks Rubicon. Hy het ook gespeel in die romantiese comedy Walkaway, wat handel oor die liefde en kultuur in New York. In 2010 en 2011 was hy Ravi in Outsourced, ’n komediereeks op NBC. In die derde en vierde seisoen van 90210 was hy Raj Kher, ’n student wat van kanker herstel.
In die rolprent The Hundred Foot Journey van 2014, sy groot filmdeurbraak, het hy Hassan Kadam gespeel teenoor Helen Mirren. Omdat hy in Amerika gebore en getoë is, was die grootste uitdaging van dié rol om die Indiese aksent, gebruike en maniërismes te bemeester. Die karakters wat sy ouers in die fliek speel, Om Puri en Juhi Chawla, kon hom baie hiermee help omdat hulle 'n noue verbintenis met Bollywood het.[2]
Middel November daardie jaar het die Amerikaanse tydskrif People hom aangewys as hul sexyste man van die week.[3][4]
In die tweede helfte van Oktober 2015 het hy en onder andere Hugh Bonneville en Gillian Anderson in Jodhpur, Indië, verfilm aan die regisseur Gurinder Chadha se rolprent Viceroy’s House, wat handel oor die Verdeling van Indië en die grootste volksverhuising in menseheugenis.[5]
Bronne[wysig | wysig bron]
- (en) Biografie op IMDB.com. URL besoek op 1 Maart 2016.
- (en) Manish Dayal Is The Summer Crush You Never Knew You Wanted, buzzfeed.com. URL besoek op 1 Maart 2016.
Verwysings[wysig | wysig bron]
- ↑ (en) The Hundred-Foot Journey Actor Manish Dayal Is PEOPLE's Sexy Man of the Week Geargiveer 28 Mei 2016 op Wayback Machine, People.com, 13 November 2014. URL besoek op 2 Maart 2016.
- ↑ (en) For Indian American actor Manish Dayal, mastering Indian accent a challenge in The Hundred-Foot Journey, AmericanBazaarOnline.com, 27 Mei 2014. URL besoek op 2 Maart 2016.
- ↑ (en) 9 South Asian Actors You Should Know, India.com, 3 Januarie 2015. URL besoek op 2 Maart 2016.
- ↑ (en) The Hundred-Foot Journey Actor Manish Dayal Is PEOPLE's Sexy Man of the Week Geargiveer 28 Mei 2016 op Wayback Machine, People.com, 13 November 2014. URL besoek op 2 Maart 2016.
- ↑ (en) Gurinder Chadha’s ‘Viceroy’s House’ Starts Shoot in India, Variety.com, Augustus 2015. URL besoek op 2 Maart 2016.
