NG gemeente Waterford

Die nuwe NG kerk Waterford.

Ds. Pieter Francois de Wet, leraar van 1949 tot 1958.

Ds. W.J. Lubbe, leraar van 1958 tot 1962.

Die NG gemeente Waterford is 'n besonder klein gemeente van die Nederduitse Gereformeerde Kerk in die sinodale gebied van Oos-Kaapland.

Stigting

Omstreeks 1850 is daar 'n klein buitekerkie op die oewers van die Sondagsrivier in die distrik en gemeente Jansenville gebou. Hierdie plekkie het later die sentrum van die gemeente Waterford geword. In 1919 is die gemeente Waterford toe van die moedergemeente van Jansenville afgestig. Twee groot wyke van die NG gemeente Somerset-Oos het ook hul gewig by Waterford ingegooi, en dan is daar ook 'n paar gesinne uit die gemeente Pearston aan Waterford afgegee.

Hierdie gemeente is met oor die 800 lidmate afgestig. In die jaar 1920 ontvang Waterford sy eerste leraar in die persoon van prop. P.S. van der Westhuizen. Daar was nog geen pastorie nie en dadelik is planne gemaak om 'n pastorie te bou. Die jong leraar kon toe later in 'n pragtige gebou sy intrek neem. In 1922 neem ds. Van der Westhuizen 'n beroep aan na Steytlerville. In dieselfde jaar word ds. C.G. Ochse in die gemeente bevestig. Hy arbei tot 1945, toe hy sy emeritaat aanvaar het.

Latere geskiedenis

In die depressiejare van 1931-'32 het die gemeente veral swaargekry wat sy geldsake betref, want dit was die tyd toe boere feitlik geen prys vir hul produkte kon kry nie. Die gemeente Waterford het destyds vir ongeveer 90 persent uit plaasboere bestaan. In hierdie jare was dit dan ook 'n hulpbehoewende gemeente, maar teen die jare vyftig het hy op eie bene gestaan en was die gemeenskap redelik welvarend.

In 1946 is ds. J. Claassen van Calvinia in die gemeente verwelkom. In hierdie tyd word sowel 'n kerkboufonds as 'n orrelfonds van stapel gestuur. In 1949 verlaat ds. Claassen die gemeente. In dieselfde jaar word ds. P.F. de Wet van Kokstad in die gemeente verwelkom. In Julie 1949 is die nuwe orrel in gebruik geneem.

Tydens die gemeente se eerste kwarteeu het hy twee keer die ervaring gehad om 'n tydelike gemeenskap in sy midde te hê. In 1918 word 'n begin gemaak met die bou van die Mentzmeer (die huidige Darlingtondam), en weer in 1946 word die walle van die dam met 32 voet verhoog.

Enkele leraars

• P.S. van der Westhuizen, 1920 - 1922
• Charles George Ochse, 1922 - 1945 (emeriteer)
• Jacobus Claassen, 1946 - 1949
• Pieter Francois de Wet, 1949 - 1958
• Willem Johannes Lubbe, 1958 - 1962
• Frederik Simon Vivier, 1963 - 1971
• Arrie Philippus van Eck, 1985 – 1987
• Dirk Wouter O'Kennedy, 22 April 1988 - 1993

Bronne

• Oberholster, dr. J.A.S. 1948. Jaarboek van die Gefedereerde Nederduitse Gereformeerde Kerke, 1949. Kaapstad: Jaarboek-kommissie van die Raad van die Kerke.
• Olivier, ds. P.L. (samesteller), 1952. Ons gemeentelike feesalbum. Kaapstad en Pretoria: N.G. Kerk-uitgewers.