Pont de Normandie

in Wikipedia, die vrye ensiklopedie
Spring na: navigasie, soek
Die Pont de Normandie

Die Pont de Normandie (of Normandië-brug) is 'n kabelhangbrug wat die Seine-rivier in Normandië (Noord-Frankryk) oorspan en die hawestede Le Havre en Honfleur met mekaar verbind. Met 'n totale lengte van 2 143,21 meter is dit een van die langste brûe van sy soort in Europa.

Die Pont de Normandie is na 'n boutyd van sewe jaar op 20 Januarie 1995 ingewy. Op daardie tydstip was dit die langste kabelhangbrug ter wêreld, en ook die afstand van 856 meter tussen sy twee pilare was destyds ongeëwenaar. Eers in die jaar 1999 stel die Tatara-brug in Japan 'n nuwe rekord op, wat in 2004 deur die Rio-Antirioprojek verbeter is.

Die Pont de Normandie maak deel uit van die Franse grootpad (autoroute) A29 en bied naas vier rylane ook twee sypaadjies vir voetgangers. Die twee betonpilare is albei gevorm soos 'n "Y" wat onderstebo staan, met 'n totale massa van 20 000 ton en 'n hoogte van 214,77 meter. Meer as 19 000 ton staal en 184 kabels is vir die oprigting van die pilare gebruik.