Prins Hendrik van Battenberg
| Prins Hendrik | |
|---|---|
 | |
| Eggenote | Prinses Beatrice van die Verenigde Koninkryk |
| Huis | Battenberg |
| Kinders | Alexander Victoria Eugénie Leopold Maurice |
| Vader | Prins Alexander van Hesse en by Ryn |
| Moeder | Gravin Julia Hauke |
| Gebore | 5 Oktober 1858 Milaan |
| Oorlede | 20 Januarie 1896 (op 37) Naby Sierra Leone |
Prins Hendrik van Battenberg (later Henry Maurice; 5 Oktober 1858 - 20 Januarie 1896) was ’n morganatiese afstammeling van die Huis van Hesse. Hy het lid van die Britse koningshuis geword toe hy trou met koningin Victoria se jongste kind, prinses Beatrice van die Verenigde Koninkryk. Deur sy dogter, prinses Victoria Eugénie van Battenberg, wat met die koning van Spanje getrou het, is Hendrik ’n voorouer van die huidige lede van die Spaanse koningshuis.
Lewe[wysig | wysig bron]
Hendrik is op 5 Oktober 1858 in Milaan gebore as die seun van prince Alexander van Hesse en by Ryn en sy vrou, gravin Julia Hauke. Sy pa was die derde oudste seun van Lodewyk II, Groothertog van Hesse, en sy vrou, Wilhelmina van Baden.
Sy ouers se huwelik was morganaties (sosiaal ongelyk) omdat Julia nie van prinslike afkoms was nie. Hendrik kon dus nie sy pa se titel erf nie en het die titel graaf Hendrik Maurice van Battenberg gekry. Nadat sy ma die titel Prinses van Battenberg gekry het, het Hendrik en sy sibbes die titels prins en prinses gekry. Hulle het egter nie ’n aanspraak op die troon van Hesse gehad nie.
Huwelik[wysig | wysig bron]
Deur hulle noue verbintenis met die Huis van Hesse het die Battenbergs in noue aanraking met die koningshuise van Europa gekom, onder andere die Britse koningshuis. Hendrik se ouer broer, prins Lodewyk van Battenberg, het getrou met prinses Victoria van Hesse en by Ryn, sy kleinniggie en ’n kleindogter van koningin Victoria. In 1884 het prins Hendrik verloof geraak aan prinses Beatrice, die jongste kind van koningin Victoria en prins Albert. Koningin Victoria het ingestem tot die huwelik,[1] mits die egpaar by haar woon.
Op 22 Julie 1885 het die koningin aan Hendrik die aanspreekvorm "Koninklike Hoogheid" gegee sodat hy dieselfde rang as sy vrou kon hê.[2] Dit het egter nie in Duitsland gegeld nie.[3] Die egpaar is op 23 Julie 1885 getroud.[4][5]
In 1895 is prins Hendrik na Wes-Afrika om in die oorlog tussen Brittanje en die Asjantiryk te veg. Daar het hy malaria opgedoen. Hy is naby Sierra Leone aan boord van die HMS Blonde oorlede.
Verwysings[wysig | wysig bron]
- ↑ "No. 25436". The London Gazette. 27 Januarie 1885. p. 357.
- ↑ "No. 25493". The London Gazette. 24 Julie 1885. p. 3425.
- ↑ Dennison, M., The Last Princess, p.150
- ↑ Purdue. "Beatrice, Princess; Battenberg, Prince Henry of". Besoek op 8 November 2007.
- ↑ "No. 25495". The London Gazette. 28 Julie 1885. p. 3529.
Skakels[wysig | wysig bron]
Wikimedia Commons het meer media in die kategorie Prins Hendrik van Battenberg.
Hierdie artikel is in sy geheel of gedeeltelik uit die Engelse Wikipedia vertaal.
