Saas-Fee

in Wikipedia, die vrye ensiklopedie
Spring na: navigasie, soek

Saas-Fee
Saas-Fee Ort, Januar 2009.jpg

Kaart Wapen
Karte Gemeinde Saas Fee 2007.png
Saas-Fee-coat of arms.svg
Vlag
 Land Flag of Switzerland.svg Switserland
 Kanton Valais-coat of arms.svg Wallis (Valais)
 Distrik Visp
 Koördinate 46° 6' N, 7° 55' O
 Stigting -
 Oppervlakte:  
 - Totaal 40,57 vk km
 Hoogte bo seevlak 1 798 m
 Bevolking:  
 - Totaal (31 Desember 2012) 1 710
 - Bevolkingsdigtheid 42,1/vk km
 Tydsone UTC +1 (MET)
 Amptelike Webwerf www.3906.ch

Saas-Fee is 'n berg- en gletserdorp in die administratiewe distrik Visp van die Switserse kanton Wallis (Valais). Die dorp is aan die voet van die Dom geleë, die hoogste bergpiek (4 545 meter bo seevlak) waarvan die hele basis in Switserland geleë is, en word deur 'n verdere twaalf bergpieke met hoogtes van meer as 4 000 meter omring.

Stuifmeel- en houtkoolvondse in plaaslike moerasse bevestig dat die huidige dorpsgebied reeds in die 4de millennium v.C. deur mense bewoon of besoek is. Die bevolking het van oudsher hoofsaaklik uit boere bestaan wat 'n ekonomies outarke leefstyl as Alpynse veetelers en akkerboere gevoer het. In die vroeë 19de eeu het eerste natuurkundiges 'n besoek aan die dorp gebring wat gaandeweg danksy die groeiende belangstelling in alpinisme tot 'n toeristelokpunt ontwikkel het. Die nabygeleë bergpiek Strahlhorn is in 1854 vir die eerste keer bestyg.

Die eerste hotel het in 1880 ontstaan, en in die volgende dekades het verdere hotelle hul deure geopen, alhoewel toerisme nog tot in die middel van die 20ste eeu 'n newebedryf in die somermaande gebly het. Die eerste skihyser is in 1948 in bedryf gestel. Maar eers met die opening van 'n pad tussen Saas-Fee en Saas-Grund, die grootste nedersetting in die Saasvallei, in 1951 het die toerismebedryf vinnig gegroei en van die wintermaande die belangrikste seisoen gemaak. In die 1950's en 1960's is alle skigebiede rondom Saas-Fee van skihysers voorsien. Die getal oornagtings het van 66 000 in 1950 tot 1,4 miljoen in 2008 gestyg.[1] Saas-Fee se dorpstrate is in 1980 vir padverkeer gesluit en tot voetgangerlane omgeskep.

Verwysings[wysig]

Eksterne skakels[wysig]

Koördinate