Samuel Colt

in Wikipedia, die vrye ensiklopedie
Spring na: navigasie, soek
Samuel Colt
’n Beeld van die betrokke persoonlikheid.
Geboortenaam Samuel Colt
Gebore 19 Julie 1814
Hartford, Connecticut, VSA
Oorlede 10 Januarie 1862
Hartford, Connecticut, VSA
Nasionaliteit Verenigde State van Amerika
Ouers Christopher Colt, Sarah Colt
Beroep Uitvinder, sakeman
Bekend vir Rewolwer
Huweliksmaat Elizabeth Hart Jarvis
Kind(ers) Caldwell Hart Colt

Samuel Colt (1814 – 1862) was 'n Amerikaanse uitvinder en sakeman. Hy was die stigter van die Colt's Patent Fire-Arms Manufacturing Company, tans bekend as die Colt's Manufacturing Company, en is wêreldwyd bekend as die man wat die rewolwer gewild gemaak het.

Beknopte biografie[wysig]

Jeug[wysig]

Samuel Colt is op 19 Julie 1814 in Hartford, Connecticut in die Verenigde State van Amerika gebore. Hy was die seun van Christopher Colt en Sarah Colt (née Caldwell). Sy vader was 'n voormalige boer wat met sy familie na Hartford verhuis het om 'n sakeman te word. Colt se moeder sterf toe hy 7 jaar oud was. Binne twee jaar na haar dood, hertrou Christopher Colt met Olive Sargeant. Samuel Colt het vier broers en drie susters gehad.

Op sy elfde verjaarsdag word Colt na 'n plaas in Glastonbury gestuur om te werk en by 'n nabygeleë skool te studeer. Hier maak hy kennis met die wetenskaplike ensiklopedie Compendium of Knowledge, waarin hy onder andere oor Robert Fulton en buskruit te wete kom. Hierdie inligting sou 'n belangrike rol in die res van sy lewe speel. In 1829 begin hy op sy vader se tekstielplantasie in Ware werk. Hier maak hy, met die kennis wat hy opgedoen het, sy eie galvaniese sel.

Ontwikkeling van die rewolwer[wysig]

In 1832 stuur Colt se vader hom na die see om ondervinding in seehandel op te doen. Hier bekom hy verdere idees wat hom later met sy uitvinding sou help. Op sy eerste seereis bou Colt reeds 'n houtmodel van 'n peperboks-rewolwer. Die rewolwer was anders as vroeëre rewolwers, omdat die oorhaalaksie die drom geroteer en gesluit het, en die skut nie dit self hoef te roteer en hoop dat alles reg in lyn is nie.[1]

In 1832 keer Colt terug na die Verenigde State. Aanvanklik werk hy weer vir sy vader, maar later besluit hy om deur Amerika te reis en kos te verdien deur demonstrasies met 'n mobiele laboratorium en laggas te doen. Dieselfde jaar verbeter hy sy idee vir 'n rewolwer, en in 1835 registreer hy 'n patent in die Verenigde Koninkryk (patent nommer 6909). Vervolgens reis hy na Frankryk om sy uitvinding te bemark. Met sy terugkeer na die Verenigde State registreer hy nog 'n patent vir 'n nuwer rewolwer (patent 9430X).

Colt bevestig self dat hy nie regtig die rewolwer uitgevind het nie, maar eerder 'n model vir 'n vuurwapen wat deur Elisha Collier uitgevind is verbeter het. Colt wou hê dat onderdele van sy rewolwer onderling uitgewissel kon word en dat dit met 'n masjien vervaardig kon word om die koste laag te hou.

Eie besigheid[wysig]

In April 1836 stig hy sy maatskappy in Patterson, New Jersey wat in die produksie van rewolwers spesialiseer. Die fabriek het moeisaam op die been gekom omdat Colt byna geen beleggers kon vind nie. Hy probeer daarom om self die geld bymekaar te maak. Hy demonstreer sy rewolwer onder andere aan president Andrew Jackson, wat Colt sy goedkeuring gee. Desondanks wou byna niemand die nuwe wapen koop nie. Met die paniek van 1837 is Colt se fabriek amper bankrot verklaar, maar hy kry sy eerste opdragte na die uitbreek van die oorlog teen die Seminole (Amerikaanse Indiane). Hierdie sukses het egter nie lank gehou nie en Colt moes sy fabriek uiteindelik sluit.

In 1847 kry Colt nog 'n geleentheid toe kaptein Samuel Walker 1 000 rewolwers vir die Texas Rangers bestel om in die Meksikaans-Amerikaanse Oorlog te gebruik. Hierdie bestelling het nuwe lewe in Colt se maatskappy geblaas en die rewolwer het ook al hoe gewilder geword. Die Kaliforniese goudstormloop en kolonisasie van die weste van die VSA het verkope 'n aansienlike hupstoot gegee.

Latere lewe[wysig]

Later koop Colt 'n stuk grond aan die Connecticut-rivier en rig 'n groter fabriek, genaamd die Colt Armory op. Hy reël vir sy personeel 'n 10-uur werksdag met 'n uur etenstyd tussenin. Hy rig ook vir hulle 'n klub naby die fabriek in. Op 5 Junie 1856 trou hy met Elizabeth Jarvis.

Met die uitbreek van die Amerikaanse Burgeroorlog is Colt deur die staat Connecticut as 'n kolonel aangestel. Sy eenheid was egter nooit in enige gevegte betrokke nie. Op 20 Junie 1861 is hy uit die weermag ontslaan.

Colt is op 10 Januarie 1862, op 47-jarige leeftyd in sy geboortedorp oorlede. Hy is by die Cedar Hill-kerkhof begrawe.

Verwysings[wysig]

  1. Soule, Gardner (1961). “The story of Sam Colt's Equalizer”. Popular Science 12: 88–93.

Eksterne skakels[wysig]