Ververing

in Wikipedia, die vrye ensiklopedie
Spring na: navigasie, soek
Hierdie Geeloogpikkewyn is besig om te verveer

Ververing is die natuurlike verskynsel by voëls om een maal per jaar (of in sommige gevalle meer as een maal per jaar) hulle verekleed te verwissel deur ou vere met nuwe vere te vervang. Dit kan 'n geleidelike proses wees waarin vere een vir een vervang word - of soms kan 'n sekere deel van die liggaam (bv die vlerk) se vere almal tegelyk vervang word. Voëls kan nooit alle vere tegelyk vervang nie, aangesien die vere hulle moet beskerm en warm hou.

Die ververingsproses kan in verskeie fases verloop en is gewoonlik simmetries. Dit beteken dat die voël weerskante van 'n denkbeeldige middellyn dieselfde vere op dieselfde tyd vervang. So sal byvoorbeeld penveer 2 op die linker- en regtervlerk tegelyk vervang word.

Kolgans: 'n voorbeeld van gelyktydige ververing[wysig]

Die Kolgans (Alopochen aegyptiacus) is 'n voorbeeld van 'n voël waarvan die primêre vlugvere op die vlerk almal tegelyk vervang word. Dit beteken dat hierdie voël vir bykans 'n maand of twee nie kan vlieg nie en dus grondgebonde is. Die voëls moet dus op 'n veilige plek bly waar hulle nie maklik die prooi van roofdiere sal wees nie. Daar moet ook genoeg kos in die omgewing wees, aangesien hulle nie kan vlieg om te gaan kos soek nie. Gedurende hierdie periode is die Kolgans dus baie kwesbaar.

Hofsanger: 'n voorbeeld van meervoudige ververing[wysig]

Willow warbler UK09.JPG

Die Hofsanger (Phylloscopus trochilus) is 'n somerbesoeker aan Suider-Afrika. Hierdie klein voëltjie (hulle is skaars 11 cm lank met 'n massa van gemiddeld 8,6g) migreer uit Europa om in Suider-Afrika die somer deur te bring. Die geweldige afstande wat hulle moet aflê gedurende migrasie bring groot slytasie op die vere mee. Dit beteken dat hulle twee keer per jaar verveer om die verslete vere te vervang – in die somer in Suider-Afrika en dan ook weer in die noordelike somer in Europa as hulle in hulle broeigebiede is.