Domkrag
'n Domkrag is 'n meganiese toestel wat gebruik word om swaar vragte op te lig of om groot kragte aan te wend. 'n Meganiese domkrag gebruik 'n skroefdraad om swaar toerusting op te lig. 'n Hidrouliese domkrag gebruik hidrouliese krag.
Die mees algemene vorm is 'n skêrdomkrag en 'n vloerdomkrag, wat voertuie oplig sodat onderhoud verrig kan word. Die skêrdomkrag is een van die eenvoudigste domkragte en word algemeen gebruik by motors. Dit is 'n meganiese domkrag wat van 'n skroefdraad gebruik maak (rotasiebeweging word omgesit in lineêre beweging). Dit is lig en kompak en behoort saam met 'n wielsleutel in elke motor se bagasieruim gestoor te wees.
'n Domkrag word gewoonlik gespesifiseer vir 'n maksimumligmassa (byvoorbeeld 2 ton of 3 ton). Industriële domkragte word vir baie groter ton gespesifiseer.
