Agtergrondinligting

in Wikipedia, die vrye ensiklopedie
Jump to navigation Jump to search

Agtergrondinligting, 'n agtergrondverhaal of agtergrond is 'n versameling gebeure wat vir 'n storielyn uitgedink word en as voorafgaande aan of aanleidend tot die intrige aangebied word. Dit is 'n literêre tegniek vir die weergee van 'n narratiewe geskiedenis wat chronologies vroeër as die narratief van die teks van primêre belang afspeel.

Dit is die geskiedenis van karakters en ander elemente onderliggend aan die situasie wat tydens die hoofnarratief bestaan. Selfs in 'n suiwer historiese werk word agtergrondinligting selektief met die gehoor gedeel.[1][2]

Gebruik[wysig | wysig bron]

As literêre tegniek word agtergrondinligting dikwels aangewend om diepte of geloofwaardigheid aan die hoofverhaal te verleen. In Poetics wys Aristoteles op die waarde van 'n dramatiese openbaring.

Agtergrondverhale word gewoonlik, hetsy gedeeltelik of ten volle, chronologies al dan nie, gedurende die loop van die hoofverhaal aan die gehoor geopenbaar. Die skepper van 'n storie kan egter ook gedeeltes van 'n agtergrondverhaal of selfs 'n hele agtergrondverhaal skep wat suiwer vir die eie gebruik is.[3]

Agtergrondinligting kan op verskeie maniere verskaf word, insluitende terugflitse (narratief), dialoë, direkte narratiewe, opsommings, herinneringe en eksposisies. Die oorspronklike Star Wars-rolprent en sy eerste twee opvolgprente is voorbeelde van 'n werk met 'n vooropgestelde agtergrondverhaal  wat later as 'n voorvolgende (prequel) reeks van drie rolprente vrygestel is.

Herinnering[wysig | wysig bron]

Herinnering is 'n metode van fiksieskryf waar 'n karakter aan iets terugdink of dit onthou. 'n Karakter se geheue speel 'n rol in die oordra van 'n agtergrondverhaal aangesien dit 'n fiksieskrywer in staat stel om inligting van vroeër uit die verhaal of van voor die begin van die verhaal te verskaf. Alhoewel herinnering nie allerweë as 'n fiksieskryf-metode beskou word nie, word herinnering algemeen deur fiksieskrywers gebruik.

Orson Scott Card skryf byvoorbeeld dat "indien dit 'n herinnering is wat die karakter op enige tydstip kon herroep, sou dit na 'n ongeloofwaardige toeval lyk indien sy dit skielik onthou net wanneer sy 'n belangrike besluit moet neem...." Verder, "as die herinnering 'n teenwoordige besluit gaan aktiveer, moes 'n onlangse gebeurtenis die herinnering geaktiveer het."[4]

Gedeelde wêreld[wysig | wysig bron]

In 'n gedeelde wêreld kan meer as een outeur dieselfde agtergrondverhaal skryf. Die latere totstandkoming van 'n agtergrondverhaal wat met 'n vorige geskrewe hoofverhaal bots, kan vereis dat 'n wysigingsmeganisme bekend as retroaktiewe kontinuïteit ("retcon") gebruik word.

Sien ook[wysig | wysig bron]

Verwysings[wysig | wysig bron]