Alfred Bernitz

in Wikipedia, die vrye ensiklopedie
Jump to navigation Jump to search
Alfred Bernitz, 1963.

Alfred Bernitz (Johannesburg, 28 Junie 1913 – onbekend) was ’n Suid-Afrikaanse sakeman en direkteur van maatskappye.

Bernitz, wat ook ’n broer, Mischa, gehad het, was die seun van Isador Bernitz, die seun van Michel Behr en Lea Friedman. Isador was die eerste lid van die Bernitz-familie wat uit Litaue na Suid-Afrika geëmigreer het. Hoewel die datums vergete geraak het, was Isador reeds voor die Tweede Vryheidsoorlog op Smithfield in die Suid-Vrystaat woonagtig. Hy het tydens die oorlog in genl. Christiaan de Wet se kommando aan Boerekant geveg. Isador Bernitz het die plaas Caledondraai besit en was voorsitter van Smithfield se Sionistiese Beweging, maar ook ’n Vrymesselaar. Destyds het Smithfield ’n klein gemeente van sowat 40 Jode en hul eie rabbi gehad. Isador het ’n winkel besit en die eerste motorhawe op Smithfield. Isador was getroud met Polly (Pescha Lippa) Suzman, wat in 1889 in die shtetl Salant, Litaue, gebore is. Hulle het mekaar in Suid-Afrika ontmoet.[1]

Alfred Bernitz het sy opvoeding ontvang aan die Grey-kollege in Bloemfontein en daarna aan die Universiteit van die Witwatersrand. Hy het in 1935 by die onderneming van sy moeder se familie, L. Suzman Bpk., aangesluit en eindelik gevorder tot mede- besturende direkteur. In 1962/'63 was hy adjunkvoorsitter van die Johannesburgse Handelskamer. Hy was ook ’n tyd lank lid van die Suid-Afrikaanse Vereniging van Handelskamers en van 1961-'62 voorsitter van die Invoerbeheeradviesraad. In die Tweede Wêreldoorlog het hy diens gedoen in die Unie-verdedigingsmag in die Midde-Ooste.

Bernitz is op 23 Maart 1938 met Joan, die dogter van B. Rosenthal, getroud. Drie dogters (en blykbaar ook drie seuns) is uit dié huwelik gebore. Bernitz se stokperdjie was gholf. Hy was lid van die Houghton-gholfklub, die Wanderers-klub en die Aeroklub. In die vroeë 1960's het hy en sy vrou by Oxfordweg 144, Melrose, Johannesburg, gewoon.

Bron[wysig | wysig bron]

  • (af) (en) Kruger, dr. D.F. 1963. Wie is wie in Suid-Afrika. Johannesburg: Vitae Uitgewers.

Verwysing[wysig | wysig bron]

  1. (en) The Bernitz Family, deur Charles Bernitz. URL besoek op 19 November 2017.