Ameniras

in Wikipedia, die vrye ensiklopedie
Die Hamadab-stele

Ameniras (fl. 1ste eeu v.C.) was 'n Meroïtiese koningin van die koninkryk Koesj.

Sy is waarskynlik die eggenote van koning Teriteqas, wat ná sy dood saam met – of as regent vir – haar seun prins Akindad oor die ryk geheers het. Sy is bekend van die Hamadab-stele wat in 1910 naby die Koesjitiese hoofstad Meroë deur John Garstang gevind is. Die inskripsie is in Meroïties, wat moeilik is om te lees, maar dit gee waarskynlik inligtings oor die Koesjities-Romeinse oorlog van 25-21 v.C. wat in 'n oorwinning vir die Koesjiete geëindig het.[1] Haar titel was kore, wat heerser beteken in Meroïties, of kdke (kandake), wat glo koningin-moeder beteken. Amptelik was haar titel Amnirense qore li kdwe li. Ameniras word ook in die Bybel genoem (Hand 8:26-27)[2]

Sy is ook uit Romeinse bronne bekend. Strabo skryf oor 'n "kandake met net een oog" wat Romeinse pogings om Koesj te verower, verhoed het. Aelius Gallus, wat Augustus se prefek in Egipte was, beweer Koesj het 'n Romeinse vasalstaat geword. Sy opvolger, Gaius Publius Petronius, het egter 'n Koesjitiese inval van Egipte tot in die Thebe-gebied afgeweer. Moontlik het Koesjiete probeer gebruik maak van Aelius Gallus se veldtog in Arabië wat sleg afgeloop het.[3]

Strabo beskryf hoe Petronius 'n teenaanval gelei het na Napata, wat die Meroïtiese hoofstad was. Geleerdes betwyfel egter of die Romeine regtig so ver suid deurgedring het. Keiser Augustus het afstand gedoen van die plan om Koesj te onderwerp.[1]

Verwysings[wysig | wysig bron]

  1. 1,0 1,1 Dictionary of African Biography, Volume 2 Professor Henry Louis Gates, Jr., Professor Emmanuel Akyeampong, Mr. Steven J. Niven, OUP USA, 2012, ISBN 0-19-538207-2, ISBN 978-0-19-538207-5
  2. Marcus Agrippa: Right-hand Man of Caesar Augustus Lindsay Powell Pen and Sword, 2015, ISBN 1-4738-5401-6, ISBN 978-1-4738-5401-7
  3. Herod the Great and Jesus: Chronological, Historical and Archaeological Evidence Gerard Gertoux Lulu.com, ISBN 1-329-69816-9, ISBN 978-1-329-69816-1

Eksterne skakels[wysig | wysig bron]