Anatoli Onoprijenko

in Wikipedia, die vrye ensiklopedie
Jump to navigation Jump to search
Anatoli Onoprijenko
Анатолій Онопрієнко
Gebore  (1959-07-25)25 Julie 1959
Oorlede  27 Augustus 2013 (op 54)
Rede vir dood  Hartversaking
Land  Sowjetunie
Bynaam  Ondier van Oekraïne
Burger O
Misdaad  Reeks massamoorde
Misdaadbesonderhede
Plek Oekraïense SSR
Datum(s)  1989–1996
Slagoffers  52
Metode  Doodgeskiet, doodgeslaan
Motief  Roof
Vonnisbesonderhede
Aangekeer  16 April 1996
Vonnis  Lewenslange tronkstraf

Anatoli Joerijowitsj Onoprijenko (Oekraïens: Анатолій Юрійович Онопрієнко, 25 Julie 1959 – 27 Augustus 2013) was ’n Oekraïense reeks- en massamoordenaar.[1] Hy is ook bekend as die Ondier van Oekraïne en Burger O. Nadat die polisie die 37-jarige voormalige bosboustudent op 16 April 1996 aangekeer het, het Onoprijenko beken dat hy 52 mense doodgemaak het.[2][3]

Kinderjare[wysig | wysig bron]

Onoprijenko is op die dorp Laski in die Zjitomir-oblast, Oekraïense SSR,[4] gebore. Hy was die jongste van twee seuns; sy broer, Walentin, was 13 jaar ouer. Toe Anatoli vier jaar oud was, is sy ma dood en sy grootouers en tante het hom grootgemaak voordat hy na ’n kinderhuis op die dorp Priwitnoje is. Volgens Onoprijenko was hy baie ongelukkig omdat hy weggestuur is terwyl sy broer by sy pa agtergebly het.[5]

Moorde[wysig | wysig bron]

Toe die polisie hom eindelik aankeer, was Onoprijenko in besit van altesaam 122 items, onder meer ’n afgesaagde TOZ-34-haelgeweer en verskeie ander wapens, wat in verskeie van die moorde gebruik is, asook artikels wat aan die slagoffers behoort het. Terwyl hy aangehou is, het hy eindelik skuld beken op agt moorde tussen 1989 en 1995. Hy het eers skuld op enige ander aanklagte ontken, maar toe beken hy het oor ’n periode van ses jaar 52 mense doodgemaak.[4] Hy het gesê hy het die opdrag van innerlike stemme uitgevoer toe hy gemoor het.[5]

Die volgende moorde is dié waarop Onoprijenko skuld beken het, in chronologiese volgorde:[5]

  • 1-10. In 1989 is ’n gesin van tien (twee volwassenes en agt kinders) tydens ’n rooftog vermoor toe hulle op die rower afkom. Onoprijenko het geê hy en ’n medepligtige, Sergei Rogozin, het verskeie huise beroof en die gesin vermoor met wapens wat hulle by hulle gehad het vir selfverdediging. Hy het daarna alle kontak met Rogozin verbreek.
  • 11-15. In dieselfde jaar is vyf mense, onder andere ’n 11-jarige seun, in hul motor doodgeskiet terwyl hulle geslaap het. Hul lyke is daarna verbrand. Onoprijenko het gesê hy wou net die motor beroof en die moorde was onbedoeld.
  • 16-19. Op 24 Desember 1995 is die Zaitsjenko-gesin van vier met ’n afgesaagde dubbelloophaelgeweer doodgeskiet tydens ’n rooftog by hul huis op Garmarnia, ’n dorp in Sentraal-Oekraïne. Die huis is aan die brand gesteek.
  • 20-24. Op 2 Januarie 1996 is ’n gesin van vier doodgeskiet. ’n Man wat verbygestap het, is ook vermoor.
  • 25-28. Op 6 Januarie 1996 het Onoprijenko na bewering vier mense in drie aparte voorvalle vermoor op die Berdjansk-Dnieprofskaja-snelweg; hy het motors voorgekeer en die insittendes vermoor.
  • 29-35. Op 17 Januarie 1996 is die Pilat-gesin van vyf in hul huis doodgeskiet voordat die huis aan die brand gesteek is. Twee moontlike ooggetuies is ook vermoor.
  • 36-39. Op 30 Januarie 1996 is ’n ma, haar twee seuns en ’n besoeker in Kiëf-oblast doodgeskiet.
  • 40-43. Op 19 Februarie 1996 is die Doebtsjak-gesin in Olefsk vermoor. Volgens Onoprijenko het hy die pa en seun doodgeskiet, die ma met ’n hamer doodgeslaan en geld van die dogter geëis voordat hy haar ook doodgeslaan het toe sy weier om vir hom geld te gee.
  • 44-48. Op 27 Februarie 1996 is die Bodnartsjoek-gesin in Malina vermoor. Volgens Onoprijenko het hy die ouers doodgeskiet en die dogters van 7 en 8 jaar met ’n byl doodgekap. ’n Uur later het hy ’n buurman doodgeskiet wat hy op die erf betrap het en toe sy lyk met die byl opgekap.
  • 49-52. Op 22 Maart 1996 was die Nowosad-gesin van vier na bewering Onoprijenko se laaste slagoffers. Volgens hom het hy die gesin doodgeskiet en hul huis aan die brand gesteek om enige getuienis te vernietig.

Arres en vonnis[wysig | wysig bron]

In Maart 1996 het die Oekraïense veiligheidsdiens en spesialiste van die kantoor van die openbare aanklaer die 26-jarige Joeri Mozola aangehou as ’n verdagte in verskeie wreedaardige moorde. Oor die verloop van drie dae is hy gemartel (gebrand, geskok en geslaan).[6] Mozola het geweier om skuld te beken en is tydens die marteling dood. Die sewe mense wat vir sy dood aanspreeklik was, het tronkstraf gekry.[7] Die regte moordenaar, Onoprijenko, is 17 dae later ná ’n enorme soektog aangekeer – sewe jaar ná sy eerste moord.

Onoprijenko het die doodstraf vrygespring omdat Oekraïne in 1995 by die Raad van Europa aangesluit het en in dié tyd onderneem het om die doodstraf af te skaf.[4] Hy het lewenslange tronkstraf gekry.

Hy is op 27 Augustus 2013 op 54-jarige ouderdom in die tronk in Zhitomir aan hartversaking dood.[4][8]

Verwysings[wysig | wysig bron]

  1. Ramsland, Katherine. "Serial Mass Murder". Crime Library. Besoek op 11 Julie 2014. 
  2. "Accused Ukrainian serial killer makes surprise request at trial". CNN. 1998-11-30. Geargiveer vanaf die oorspronklike op 2008-05-19. Besoek op 2008-09-10. 
  3. Commarasamy, James (1998-11-23). "The lives changed by Onoprienko". BBC News. Besoek op 2008-09-10. 
  4. 4,0 4,1 4,2 4,3 Serial killer Onopriyenko dies in Zhytomyr prison, Interfax-Ukraine (28 Augustus 2013)
  5. 5,0 5,1 5,2 Lohr, David. "Anatoly Onoprienko, Citizen O". Crime Library. Besoek op 11 Julie 2014. 
  6. "State security agents appeal torture convictions". PRIMA News Agency. 2000-12-07. Besoek op 2008-09-10.  [dooie skakel]
  7. "Ukrainian Ombudsman brings a suit against Prosecutor's office and Cheka agents". PRIMA News Agency. 2002-03-19. Besoek op 2012-01-19. 
  8. "Серийный убийца Анатолий Оноприенко умер в украинской тюрьме". Interfax (in Russian). 27 Augustus 2013. Besoek op 27 Augustus 2013. 

Eksterne skakels[wysig | wysig bron]