Asyn

in Wikipedia, die vrye ensiklopedie
'n Fles balsamiese asyn
Bottels asyn met oreganum binne-in.
Produksie van tradisionele swartasyn in Kirishima, Japan (2009).

Asyn is 'n vloeistof, 'n oplossing van 4 tot 15% asynsuur (CH3COOH) in water. Asynsuur word vervaardig deur die fermentasie van etanol deur asynsuurbakterieë. Asyn word deesdae hoofsaaklik gebruik as 'n kookbestanddeel en voedselpreserveerder, maar histories was dit die mees beskikbare ligte suur.

Asyn het 'n groot verskeidenheid van nywerheids-, mediese en huishoudelike gebruike. Sommige word steeds aanbeveel, soos die gebruik as 'n algemene huishoudelike reiniger.

Kommersiële asyn kan óf deur vinnige of stadige fermentasieprosesse vervaardig word. Gewoonlik word stadige metodes gebruik vir tradisionele asyn, en fermentasie vorder stadig oor die loop van maande of 'n jaar. Die langer fermentasietyd help met die opbou van 'n slyk bestaande uit skadelose asynsuurbakterieë.

Met vinnige metodes word asynmoer (d.w.s. bakteriële kultuur) by die vloeibare bron gevoeg voordat dit belug word met behulp van 'n venturi pompstelsel of groot waaiers. Die verhoogde suurstof-teenwoordigheid bevorder die versnelde fermentasie van die substraat tot asyn. Met die vinnige proses kan asyn binne 'n tydperk van 20 uur tot drie dae geproduseer word.

Indien daar tydens die veroudering van wyn lug in die vat kom, kan die alkohol omgeskakel word na asynsuur en ontstaan ​​wynasyn.

Die Franse chemikus en bioloog Louis Pasteur (1822-1895) het die asynsuurbakterieë ontdek.

Eksterne skakels[wysig | wysig bron]

Hierdie artikel is in sy geheel of gedeeltelik vanuit die Engelse Wikipedia vertaal.