Balletterme
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Ballet maak meer as die meeste ander beroepe van sy eie "taal" gebruik. Daar is byvoorbeeld 'n groot aantal Franse terme vir passies, posisies en houdings, wat ook 'n bewys is van die belangrikheid van Frankryk en die Franse in die ontwikkeling van hierdie kunsvorm. Die term ballerina is 'n Italiaanse benaming vir 'n danseres met 'n "hoë rang". Die begrip prima ballerina het ook sedertdien ontstaan en word gebruik vir die belangrikste danseres in 'n groep van 2 of 3 ballerinas.
'n Pas de deux is 'n dans vir twee persone. In klassieke ballet kan 'n prima ballerina en 'n premier danseur (hoofdanser) hul vaardigheid vertoon in 'n grand pas de deux, wat gewoonlik uit 'n entrée, ʼn adagio, variasies vir die man en vir die vrou en 'n skouspelagtige coda (slotgedeelte) bestaan. Benewens die pas de deux, is daar ook die pas de troix (vir drie), die pas de quatre (vir vier) en so meer, tot en met die pas de dix (vir tien). Die optel van 'n dansmaat word deurgaans met die Engelse woord lift aangedui.
Nog moderne Engelse dansterme wat gereeld gebruik word, is contraction en release, wat op die saamtrek en ontspan van die liggaamspiere dui. Balletskoene met verstewigde punte word pointes genoem. In 1880 het die tutu, 'n kort balletrokkie van verskeie lae gaasmateriaal, ontstaan. Die romantiese tutu, wat tot by die enkel reik en soms 'n jupponage genoem word, is sedert 1830 gebruik. Nog balletterme wat dikwels gebruik word, is die volgende:
Assemble: 'n Sprong wat op twee voete begin en eindig.
Batteren: 'n Springpassie waartydens die bene een of meer keer in die lug gekruis of teen mekaar geslaan word.
Cambre: 'n Beweging waarin die liggaam van die middel af onder toe gebuig word.
Chasse: 'n Passie waartydens die voete nie van die grond gelig word nie.
Développé: 'n Beweging waarin die been met 'n hoek van 45 of 90 grade
vorentoe, sywaarts of agtertoe gestrek word.
Echappé: 'n Passie waartydens die voete gelyktydig van 'n geslote posisie na die tweede posisie beweeg word.
Fouetté: 'n Vinnige swaaibeweging van die been.
Glissade: 'n Glystap wat in 'n geslote posisie begin en eindig.
Jete: 'n Sprong van die een been na die ander.
Pirouette: 'n Draai op een been.
Bronnelys[wysig | wysig bron]
- Wêreldspektrum, 1982, ISBN 0908409435, volume 2, bl. 159, 160