Betsy de la Porte
Die Suid-Afrikaanse mezzosopraan Betsy de la Porte is op 16 Junie 1901 in Wolmaransstad gebore en het onder madame Hodgson Palmer gestudeer.
Met 'n beurstoekenning van Unisa het sy in 1925 na Londen vertrek, waar sy drie jaar lank aan die Royal Academy of Music gestudeer het.
In 1928 het sy haar debuut in Covent Garden gemaak. Ná verdere studie in Duitsland het sy in 1930 na Londen teruggekeer en in die volgende ses jaar gereeld in Covent Garden opgetree. In 1935 het sy met mnr. W.J.G. Tomlinson in die huwelik getree. Ná haar terugkeer na Suid-Afrika het sy bekendheid verwerf met haar konsert- en radio-optredes.
As die bekendste kunstenaar van haar tyd het sy gereeld ander kunstenaars, en veral komponiste, geïnspireer om liedere vir haar stem te skryf, wat sy dan gereeld by haar uitvoerings ingesluit het. .
In 1947 is sy weer na Londen, waar sy op uitnodiging van Benjamin Britten lid van sy English Opera Group geword het. Tydens die Glyndebourne Festival het sy in Britten se nuwe komiese opera, Albert Herring, die rol van Mrs. Herring vertolk.
Van 1956 tot met haar dood in 1970 het sy sanglesse in Johannesburg gegee en onder haar leerlinge het Sarie Lamprecht, Rita Roberts, Doris Brasch, Elizabeth Heyns en Anne Hamblin getel. Sy het ook 'n groot biblioteek van musiek vir solostemme opgebou en gereeld ander kunstenaars met die saamstel van hul programme gehelp.
Bronnelys[wysig | wysig bron]
- Wêreldspektrum, Volume 4, bl.223, ISBN 0908409451
