Blou energie

in Wikipedia, die vrye ensiklopedie
Jump to navigation Jump to search

Blou energie is energie wat uit die verskil in soutgehalte verkry kan word.

Die osmotiese druk en die soutkonsentrasie van soetwater en soutwater is nie dieselfde nie en op plekke waar hulle saamkom soos by die monding van 'n rivier kan uit hierdie verskille energie verkry word. Daar word navorsing gedoen om te bepaal of hierdie blou energie 'n aanvulling van groen energiebronne soos sonenergie of windenergie kan oplewer.

PRO[wysig | wysig bron]

PRO in Tofte

Die Noorse besigheid Statkraft het van 2009 tot 2014 die eerste en enigste proeffabriek in bedryf gehad wat op die verskil in osmotiese druk gebaseer was. Hierdie metode word Pressure Retarded Osmosis (PRO) genoem. 'n 'Voedstroom' van rivierwater word, geskei deur 'n osmotiese membraan, met 'n 'trekstroom' van soutwater in kontak gebring. Die trekstroom neem deur osmose water op van die voedstroom en sy druk word hierdeur verhoog. Hierdie druk word gebruik om turbines aan te dryf en so elektrisiteit op te wek.

Die PRO-fabriek in Tofte het net 10kW gelewer. Berekenings het egter getoon dat op hierdie manier ongeveer 1% van die wêreld se energieverbruik gedek (~2000 TWh) kan word. Ongelukkig het die projek net 'n energiedigtheid van 1 W/m2 bereik en om ekonomies te wees, moet die membrane minstens 5W/m2 lewer. Daar is membrane wat 10W/m2 lewer maar hulle is te duur. Die projek is daarom in 2014 gestaak.[1]

RED[wysig | wysig bron]

Die proefinstallasie op die Afsluitdyk

Die Nederlandse besigheid REDstack BV het in 2014 naby Breezanddijk op die Afsluitdyk 'n proeffabriek geopen wat op 'n ander beginsel berus Reverse Electro Dialysis (RED). In hierdie omgekeerde dialise-tegniek word die soutwater deur twee membrane van die soetwater geskei. Die een membraan laat selektief net negatiewe anione deur, die ander een net positiewe katione. Hierdeur ontstaan 'n elektrochemiese potensiaal en die stelsel word dus 'n soort battery wat stroom lewer uit die soutkonsentrasieverskille van die twee waterstrome. Die soetwater word hierdeur brakwater wat in see vrygestel kan word. [2] Fuijfilm is die bedryf wat hierdie elektrodialisemembrane lewer.

In 2017 begin 'n tweede projek in Katwijk aan die Hollandse kus.

Verwysings[wysig | wysig bron]