Boestrofedon

in Wikipedia, die vrye ensiklopedie
’n Voorstelling in Engels van die boestrofedonstyl in antieke Griekse manuskripte (reëls 2 en 4 is van regs na links).

Boestrofedon, van die Griekse βουστροφηδόν, "soos ’n os draai" (wanneer geploeg word), is ’n soort teks wat in twee rigtings geskryf word. Dit word veral gesien in antieke manuskripte en inskripsies.[1] In plaas van skryf van links na regs soos in Afrikaans of van regs na links soos in Arabies en Hebreeus, is elke alternatiewe reël in die teenoorgestelde rigting, met letters wat omgekeer word asof hulle ’n spieëlbeeld is. Dit was ’n algemene manier van klipskryfwerk in Antieke Griekeland.[2]

Verduideliking[wysig | wysig bron]

Baie antieke geskrifte is in ’n boestrofedonstyl geskryf; in Griekeland het dit in die Hellenistiese tydperk al hoe minder voorgekom.

Dit word soms ook op ander gebiede gebruik, soos om die beweging van sekere matriksdrukkers te beskryf. Hoewel die drukkop in teenoorgestelde rigtings beweeg, is die teks egter nie in ’n boestrofedonstyl nie.

Omgekeerde boestrofedon[wysig | wysig bron]

’n Voorstelling in Engels van die omgekeerde boestrofedonstyl, soos dit in rongorongo voorkom.

Op die houttabelle en ander kunsvoorwerpe van Paaseiland kom ook ’n boestrofedonskrif voor met die naam rongorongo, wat nog nie ontsyfer is nie. In rongorongo is die teks in elke reël teen 180 grade gedraai eerder as dat dit ’n spieëlbeeld is; dit word ook van onder na bo gelees. Dit word "omgekeerde boestrofedon" genoem.

Verwysings[wysig | wysig bron]

  1. Sampson, Geoffrey (1985). Writing Systems: A Linguistic Introduction. Stanford University Press. p. 103. ISBN 0-8047-1756-7.
  2. Threatte, Leslie (1980). The grammar of Attic inscriptions. W. de Gruyter. pp. 54–55. ISBN 3-11-007344-7.

Eksterne skakels[wysig | wysig bron]