Burg Lockenhaus
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Burg Lockenhaus is 'n kasteel in die sentrale gedeelte van die Oostenrykse deelstaat Burgenland. Dit is as heuweltopkasteel op 'n rotsmassief in die bergreeks Günser Gebirge opgerig, bo-oor die Günsrivier en net buite die gelyknamige nedersetting, en is tans in die Oostenryks-Hongaarse oorgrens-natuurpark Geschriebenstein-Irottkö geleë.
Geskiedenis[wysig | wysig bron]
Die oudste historiese dokument, waarin na die kasteel verwys word, dateer van 1242. Die kasteel is omstreeks 1200 gebou en aanvanklik Leuca genoem. Die oudste dele is die verdedigingstoring en die ringmuur van die sentrale gedeelte. Die kapeltoring en die Gotiese suilesaal van die riddersaal met twee skepe is ietwat later bygevoeg. Fragmente van 13de eeuse fresko's - die oudste in enige nie-kerklike gebou in Burgenland - het in die kasteelkapel bewaar gebly.
Historiese dokumente noem die grawe van Güssing (Johann I van Héder) as kasteeleienaars in die tydperk tussen 1270 en 1337. Tussen die 14de en 17de eeu was die kasteel in besit van die families Kanizsay (1390 tot 1535) en Nádasdy (1535 tot 1672). Ná die teregstelling van Frans III Nádasdy in 1671 is die kasteel as 'n pand aan Nikolaus Draskovich gegee. Vanaf 1676 tot 1968 was dit in besit van die Esterházy-familie. Die kasteel was in 'n baie slegte toestand toe dit in 1968 deur die Oostenrykse skrywer Paul Anton Keller en sy vrou gekoop is. Die Kellers het al hul private bates aangewend om die kasteelkompleks te renoveer. Ná Paul Anton Keller se afsterwe in 1976 is die renovasiewerk deur die Prof. Paul Anton Keller-stigting Burg Lockenhaus voortgesit. Sedert 1968 is altesaam elf miljoen Oostenrykse sjieling aan die projek bestee.
Naas sy argitektoniese en opvoedkundige waarde vervul die burg tans ook 'n vermaaklikheidsfunksie. 'n Hotel binne sy mure dien as toeristeverblyf.
Argitektoniese beskrywing[wysig | wysig bron]
Burg Lockenhaus bestaan uit 'n voorburg en die hoofkasteel wat daaragter lê. Tot op datum is geen omvattende navorsingswerk oor die gebou gedoen nie. Naas die laat-Romaanse kapeltoring het ook die verdedigingstoring naby die poort tot die hoofkastel in sy oorspronklike toestand bewaar gebly.