Buro vir Staatsveiligheid

in Wikipedia, die vrye ensiklopedie

Die Buro vir Staatsveiligheid was ’n Suid-Afrikaanse staatsdepartement wat in 1969 ingestel is ten opsigte van aangeleenthede wat op die veiligheid van die staat betrekking gehad het. Dit is in 1980 vervang deur die Nasionale Intelligensiediens (NI).

Lt.genl Hendrik van den Bergh het in Augustus 1968 toestemming by John Vorster en P.W. Botha verkry vir stigting van ’n oorhoofse intelligensieliggaam. Die Buro is met die funksies belas om (1) alle aangeleenthede wat die veiligheid van die staat raak te ondersoek, die inligting wat ingewin is te korreleer en te evalueer en om die regering, belanghebbende staatsdepartemente en ander instansies, waar nodig daaromtrent in te lig en te adviseer; en (2) sodanige ander funksies en verantwoordelikhede as wat van tyd tot tyd bepaal mag word, uit te oefen. Die Staatspresident het dit goedgekeur dat die administrasie van die buro aan die Eerste Minister opgedra word. Die departementele hoof daarvan was die veiligheidsraadgewer van die Eerste Minister, te wete Hendrik van den Bergh.

Die organisasie is in Mei 1969 bekendgestel, en was gou by die media as B.O.S.S. bekend.[1] Kommer oor die organisasie se wye mandaat en volmag is gou uitgespreek,[1] aangesien dit ’n gesentraliseerde liggaam was wat intelligensie-insameling vir beide die polisie en weermag sou behartig.

Die Buro het onder meer berug geword vir die betrokkenheid by die Inligtingsdebakel, toe Suid-Afrikaanse regeringsfondse aangewend is vir die stigting van 'n Engelstalige pro-Nasionale Party koerant, The Citizen. Hierdie debakel was die hoofrede vir die Buro se vervanging in 1980.

Verwysings[wysig | wysig bron]

  1. 1,0 1,1 Webmeester, Gelofteland (18 Februarie 2011). "Boss-spioen moes liewer saamgewerk het..." Politieke sluipmoorde in Suid-Afrika. Gelofteland.

Eksterne skakels[wysig | wysig bron]

Sien ook[wysig | wysig bron]