Calvados

in Wikipedia, die vrye ensiklopedie
Spring na: navigasie, soek
'n Bottel Calvados uit die Pays d'Auge

Calvados (of Eau de Vie de Cidre) is 'n distillaat (met meer as 40% alkohol) wat van Franse sider (cidre) gemaak word. Die sider bly in die vat op sy gis; die beste calva's, soos die Franses dit noem, word volgens die méthode Charentaise gedistilleer - 'n prosedure wat twee tot vier jaar kan neem. By die eerste distillasie ontstaan die sogenaamde petite-eau ("klein water") wat sowat een jaar in klein eikevate gestoor word. Sodoende kry dit sy helderbruin tot barnsteengeel kleur en sy tipiese boeket. Terwyl die appelsmaak langsamerhand verdwyn, kry die calva iets van die eikehoutsmaak by.

Die meeste calva's word op klein plase gedistilleer wat hul eie stokery besit. Die naam Calvados sê niks oor die oorsprong van die produk nie. Slegs in die Normandiese Pays d'Auge word Calvados van oorsprong ("Appellation d'Origine Contrôlée", AOC) gebrand. Die stokerye is hier verplig om die sider twee keer (soos Cognac) te brand. Na sowat twee jaar mag die Calvados "Vieux" genoem word en drie sterre dra, en na drie jaar mag dit ook as "Vieille Réserve" bemark word. Die oudste en duurste soorte het etikette wat die ouderdom van die calva vermeld; hulle dra gereeld opskrifte soos "Extra", "Napoléon", "Hors d'Âge" of "Âge inconnu".

Die gewone soorte calva word slegs een keer gebrand (soos Armagnac). Watter soort nou die beste smaak het is vir die verbruiker om te besluit. Fynproewers kies gewoonlik vir die ouer soorte calva.

Danksy die Normandiese kookkuns wat groot hoeveelhede crème fraîche, botter en room gebruik, word die calva in Normandië graag as trou Normand gedrink - dit wil sê as 'n aptytwekker voor en tydens die maaltye. 'n Gewilde variasie is Calvados-sorbet.

Eksterne skakels[wysig]