Fleet (rivier)

in Wikipedia, die vrye ensiklopedie
Die invaart tot die Fleetrivier. Skildery deur Samuel Scott, omstreeks 1750
Een van die Hampstead Ponds

Die Fleetrivier (Engels: Fleet River) is 'n takrivier van die Teems en tans die grootse van Londen se ondergrondse riviere. Sy bronriviere is twee klein stroompies wat in Hampstead Heath in die noorde van die Britse hoofstad ontspring. Die waterlope van dié twee riviertjies voed 'n reeks vywers, die Hampstead Ponds en Highgate Ponds, nadat hulle in die 18de eeu ingedam is om plaaslike nedersettings van drinkwater te voorsien.

Die twee stroompies se waterlope begin vanaf die suidelike rand van Hampstead Heath ondergronds vloei om as rioolkanale te dien voordat hulle in Camden Town verenig, verby die King's Cross- en Farringdon-stasies vloei en uiteindelik by Blackfriars-brug in die Teems uitmond. Die rivierloop se totale lengte vanaf die vywers tot die monding is 6 km (4 myl).

Die Fleet se boloop is vroeër ook Holbourne genoem en het sy naam aan die huidige stadsdeel Holborn in die London Borough of Camden verleen. Die riviername is respektiewelik afgelei van die Oud-Engelse holburna ("stroompie in 'n diep vallei") en flēot ("monding"). Die rivier was daarnaas ook die naamgewer vir Fleet Street - 'n straat waarvan die oostelike einde naby die historiese Fleet Bridge geleë is (tans Ludgate Circus).