Gözleme

in Wikipedia, die vrye ensiklopedie

Gözleme is 'n dun pita brood van Yufka-deeg wat gevul word met 'n gekruide vulsel en is 'n gunsteling in die Turkse kookkuns. Die deeg word gemaak van koekmeel, water en sout (sommige resepte het 'n klein bietjie gis by) en word dan in 'n bal gevorm. Na die deeg vir ongeveer 'n halfuur onder 'n klam lap gelê het, word die balle met 'n dun koekroller uitgerol tot plaatgrootte pannekoeke.

Die een helfte van die koek word dan bedek met 'n vulsel en dan word die koek toegevou en om die rande toegeknyp. Die Gözleme word sonder baie olie/vet op 'n Sac, 'n effe konvekse plaat, gebak. Tradisioneel was hulle gebak op 'n warm steen of in 'n droë pan. Na ongeveer vyf minute word die koek omgedraai en vir 'n verdere vyf minute gebak. Voor die Gözleme bedien word, word dit met 'n lagie gesmelte botter gesmeer. Die gewildste weergawe is Peynirli Gözleme met 'n feta kaas, spinasie en kruie vulsel. Ander vulsels wat gebruik word, is aartappels of sterk gekruide gemaalde lamsvleis. Daar is ook soet vulsels wat as nagereg bedien kan word.