Geldwassery

in Wikipedia, die vrye ensiklopedie

Geldwassery is die uitvoer van transaksies om die herkoms van onwettig verkrygde geldsomme te verberg. Die doel van geldwassery is om dié geld te kan bestee en belê sonder dat daar bewys kan word dat dit van kriminele oorsprong is, en om te voorkom dat die geld deur die gereg in beslag geneem kan word.

Oorsprong van die geld[wysig | wysig bron]

Dit gaan hier om geld, of andere bates, wat van kriminele aktiwiteite afkomstig is, soos byvoorbeeld met dwelmhandel, mensehandel, diefstal en bedrog. In sommige lande is die lys van sogenaamde basismisdrywe (misdrywe wat uiteindelik tot straf weens geldwassery kan lei) beperk tot slegs 'n sekere aantal, terwyl in ander lande alle misdrywe aanleiding tot vervolging weens geldwassery kan veroorsaak.

Fases[wysig | wysig bron]

Oor die algemeen word by geldwassery tussen drie fases onderskei:

  • Plasing/opbrengs: waarby die rykdom (meestal in die vorm van kontant geld) vir eers in die finasiële sisteem gebring word.
  • Versluiering/sirkulasie: waarby 'n opeenvolging van soms komplekse finansiële transaksies uitgevoer word ten doel om die oorsprong van die rykdom te verskuil.
  • Integrasie/investering: waarby die rykdom in die opperwêreld (in teenstelling met die kriminele onderwêreld) belê word, byvoorbeeld in die investering in nie-roerende goedere, oftewel vaste bates.

Metodes[wysig | wysig bron]

By geldwassery word 'n verskeidenheid metodes toegepas.

Via die buiteland[wysig | wysig bron]

Iemand wat 'n fortuin met dwelmhandel verdien het, sou die volgende metodes kon toepas:

  • Hy rig 'n paar bedrywe op in 'n ver land met gebrekkige kontrole, met 'n vennootskap in sy eie land;
  • Die geld word oorgeplaas na die bedryf in die buiteland, wat dit weer in 'n ander bedryf investeer.
  • Die plaaslike bedryf leen dan geld van die buitelandse bedryf en investeer dit in geboue. Die eienaar kan nou gewoon wins maak met die opbrengs van die dwelmhandel, terwyl dit moeilik is vir die polisie om die herkoms van die geld te bepaal.

Transaksies wat daarby 'n rol speel:

  • Geld wissel van een valuta na 'n ander;
  • Geldoorplasings (sogenaamde Money transfers) - d.w.s. 'n spoedsending van geld wat kontant inbetaal word en dan elders in die wêreld weer afgehaal word. Na die sending kan die ooreenstemmende bedrag soms al na 'n enkele kwartier in die buitelandse kantoor opgeneem word.

Met 'n eie vennootskap of korporasie[wysig | wysig bron]

'n Ander metode om die oorsprong van geld te verberg is die misbruik/gebruik van die regspersoon (korporasie) self. Die (boekhoukundige) strukture van 'n korporasie kon gebruik word om krimineelverkrygde geld in te spuit.

  1. Via lenings toegestaan aan die geldwassers se verwante bedrywe: dit is die loan-back metode, waarby geld eers via byvoorbeeld fisieke vervoer na 'n ander land (met minder streng teengeldwasserywetgewing) gebring word en in 'n rekening van 'n ander korporasie (beheer deur die geldwassers) gedeponeer word. Hierdie korporasie verskaf dan aan die eerste korporasie 'n lening wat nie teruggevoer word nie en later die benaming "uitgestelde lening" verkry.
  2. Via die fiktiewe verhoging van die omset: in 'n korporasie waar kontant as 'n normale betaalmiddel aanvaar word, word die nuwe geld onder voornemens van die normale omset van 'n gesonde bedryf ingebring. Dat daar op hierdie geld belasting betaal moet word, is 'n irriterende bysaak, maar dit staan nie in verhouding tot die gemak waarmee die geld gewas kan word nie.
  3. Die inspuiting van geld wat gewas moet word via die lopende rekening is 'n variasie op die loan-back metode, maar hier word die geld regstreeks ingebring.

Geldwassery via 'n fiktiewe verhoging van omset is baie moeilik om op te spoor. Dit vereis 'n permanente vergelyking van die aantal kliënte met die gegewe aantal verkope. Wie ken nie die voorbeeld van 'n restaurant wat heeldag leeg staan maar tog bly voortbestaan nie?

Dobbelhuis[wysig | wysig bron]

'n Metode wat soms gebruik word om geld te was, is die koop en weer inruil van kasinoskyfies in 'n dobbelhuis. Die eienaar van die geld verklaar dat hy die geld wettiglik met dobbel gewen het.

Vals fakture[wysig | wysig bron]

Verder kan vals fakture uitgereik word. Die ontvanger van die geld beweer dat daar goedere of dienste voor gelewer is, wat in werklikheid nooit gebeur het nie.

Eksterne skakels[wysig | wysig bron]

Hierdie artikel is in sy geheel of gedeeltelik vanuit die Nederlandse Wikipedia vertaal.