Gravensteen

in Wikipedia, die vrye ensiklopedie
Spring na: navigasie, soek
Die Gravensteen

Die Gravensteen is 'n buitengewoon goed behoue middeleeuse kasteel in Gent. Dit is in die stadsentrum geleë en vorm 'n gewilde toeriste aantreklikheid. Die ligging van die kasteel is tussen twee takke van die Leie, waar daar oorspronklik 'n hoë sandduin te midde van die moerasagtige gebied was.

Die eerste versterking hier is vermoedelik deur Graaf Boudewijn I (837-879) opgerig om as verdediging teen die invallende Noormanne te dien. Onder Graaf Arnulf I (889-965) is houtversterkings aangebring, wat as die eerste voorlopers tot die latere kasteel gesien kan word. Daar was in die tiende eeu al sprake van 'n "novum castellum", of nuwe kasteel. Graaf Robrecht I van Vlaanderen (tussen 1029/1032-1093) het die bestaande versterking drasties laat ombou, en die hoofgeboue met steen herbou. Die huidige kasteel, en sy muur met 24 torings, is deur Graaf Filips van Elsas (1142-1191) in 1180 laat oprig.

Aanvanklik het die kasteel ook as die woonplek van die grawe gedien, maar Graaf Lodewijk van Male (1330-1384) verhuis na die latere Prinsenhof, terwyl die kasteel voortaan steeds die algemene bestuur van die graafskap Vlaandere sou huisves. Die munt van Gent is in 1353 na die kasteel verskuif, en vanaf 1407 ook die Raad van Vlaanderen. Buiten hierdie funksies, het die kasteel ook as 'n gevangenis en as plek vir die gepaardgaande marteling gedien.

Vanaf omstreeks 1800 het die kasteel in verval geraak, en is hy vir onder andere 'n katoenspinnery gebruik. Herstellingswerk is eers in die laat 19de eeu begin, te midde van 'n herwaardeering van die kasteel en sy historiese waarde. Deesdae kan die Gravensteen deur die publiek besoek word, en hy huisves ook die Gerechts- en Wapenmuseum.