Haatspraak

in Wikipedia, die vrye ensiklopedie
Hierdie artikel bevat nie ’n bronnelys nie, wat beteken dat die inhoud nie geverifieer kan word nie.
Enige bevraagtekende inligting mag dus ook mettertyd verwyder word. Help Wikipedia deur betroubare bronne tot die artikel by te voeg.
SIM-kaart in Pole met die slagspreuk van die veldtog teen haatspraak "Woorde het krag, gebruik hulle verstandig"

Haatspraak verwys na spraak of geskrewe teks wat daarop gemik is om intimidasie, geweld of vooroordeel teen 'n groep mense op grond van hulle ras, etnisiteit, afkoms, geloof, seksuele oriëntasie, of gestremdheid te bewerkstellig.

Wette teen haatspraak[wysig | wysig bron]

In baie lande is opsetlike gebruik van haatspraak 'n kriminele oortreding wat verbied word in terme van wetgewing teen die aanhitsing van haat.

Voorbeelde:

  • Ontkenning van die Joodse menseslagting (Engels: Holocaust denial) is teen die wet in sewe Europese lande as 'n vorm van haatspraak en die Europese Raad het wetgewing goedgekeur teen enige vorm van revisionisme, wat gedefinieer word as die ontkenning of afgradering van menseslagtings of misdade teen die mensdom.
  • In die Verenigde Koninkryk is aanhitsing tot rasse-haat 'n oortreding in terme van die Public Order Act 1986 met 'n maksimum vonnis van tot sewe jaar tronkstraf.
  • In Kanada is die voorstaan van menseslagting of die aanhitsing van haat teen enige 'identifiseerbare groep' 'n strafbare oortreding met 'n maksimum tronkstraf van twee tot veertien jaar. 'n 'Identifiseerbare groep' word gedefinieer as enige deel van die publiek uitgeken deur velkleur, rassegroep, geloof, herkoms of geslagsorientasie. Daar word uitsonderings gemaak vir gevalle van feitlike stellings, deelnemers aan openbare debat en godsdiensleer.
  • In Ysland is die haatspraakwet nie beperk tot aanhitsing van haat nie maar sluit dit ook die uitdrukking van sulke haat in (Artikel 233 a. in die Yslandse Kriminele Reg)
  • Victoria, Australië se Racial and Religious Tolerance Act 2001, verbied optrede wat haat of ernstige minagting teen 'n groep aanblaas of wat neerkom op ernstige afkeer of bespotting van 'n ander persoon op grond van ras of geloofsoortuiging .
  • In Suid-Afrika word vryheid van uitdrukking deur die Grondwet beperk om propaganda vir oorlog, die aanstigting van dreigende geweld en die verkondiging van haat wat op ras, etnisiteit, geslagtelikheid of godsdiens gebaseer is en wat aanhitsing om leed te veroorsaak, uit te sluit. Die Wet op bevordering van gelykheid en vermyding van onregverdige diskriminasie (Engels: Promotion of equality and prevention of unfair discrimination act) gee praktiese uitvoering aan die bepalings deur haatspraak spesifiek te verbied. Dit bepaal dat niemand woorde gegrond op een of meer van die verbode gronde (ras, etnisiteit, geslagtelikheid of godsdiens) mag publiseer, propageer, voorstaan of kommunikeer wat op billike wyse aangetoon kan word as daarop gemik sou wees om kwetsend, nadelig of gemik op aanhitsing van benadeling, of haat bevorder nie.

Sien ook[wysig | wysig bron]