Herna de Villiers

in Wikipedia, die vrye ensiklopedie
Jump to navigation Jump to search
Herna de Villiers
Naam Hermanna Anna Cornelia de Villiers
Geboorte Oktober 1917
Pretoria, Transvaal
Sterfte 21 Junie 2012
Beroep Onderwyseres, skryfster

Herna de Villiers (1917–2012) was ’n Afrikaanse skryfster van hoofsaaklik liefdesromans.

Lewe en werk[wysig | wysig bron]

Hermanna Anna Cornelia de Villiers is in Oktober 1917 in Pretoria gebore. In haar geboortestad begin sy met haar skoolopleiding en gaan later ook skool in Kaapstad, Kimberley en op Boshof in die Vrystaat. Na skool bekwaam sy haar in Pretoria as onderwyseres. Na haar troue bly sy en haar man in Kaapstad, waar haar vier kinders (Paul, Karl, Jan en Ingrid) gebore is. Sy was ’n goeie swemmer wat die Westelike Provinsie in swem verteenwoordig het. Haar man is in dieselfde jaar waarin haar jongste kinders, ’n tweeling, gebore is, oorlede. In hierdie selfde jaar is haar pa ook oorlede. As alleenouer maak sy haar vier kinders groot deur onder andere op Olifantsfontein en in Kemptonpark skool te hou. Na haar aftrede as onderwyseres word sy redakteur van die Suid-Afrikaanse Uitsaaikorporasie se radioprogramgids SAUK-Bulletin. Die laaste jare van haar lewe slyt sy op ’n plaas op Roossenekal in Mpumalanga, waar sy by haar seun Paul en sy gesin inwoon. Sy is op 21 Junie 2012 oorlede.[1]

Skryfwerk[wysig | wysig bron]

Sy begin in die veertigerjare skryf, na haar man se dood. Haar eerste skryfwerk is kortverhale, waarvan talle in tydskrifte soos Sarie gepubliseer is. Sy skryf ook ’n paar dramas, waarna sy haar op liefdesverhale toespits. “Die voorbladnooi” is ’n radiodrama wat in 1969 die naaswenner is in die SAUK se radiodramakompetisie. Dit is ’n blyspel wat later ook vir die verhoog verwerk word. “Bitterappels” en “Duet in twee sleutels” is eenbedrywe wat deur Dalro gepubliseer word.

Sy raak egter veral bekend vir haar liefdesromans. In “Kranse van Gevonden” (1982) bedank Delia Maree uit haar werk na haar ma se dood. Sy is nou heeltemal alleen en aanvaar ’n betrekking op Gevonden, waar sy die tik en persversorging van ’n manuskrip moet voltooi. Sy kom goed oor die weg met die middeljarige eienaar, Japie Landman, maar sit gou vas met sy seun, Abel, ’n veearts vir wie sy ’n reeks boeke oor skaaprasse aan ’n uitgewer moet lewer. Abel is in ’n rystoel nadat hy verlam is in ’n ongeluk in die kranse van Gevonden. Die oorsaak van Abel se ongeluk en ook die neerdrukkende atmosfeer op Gevonden bly ook in die huis, naamlik Gezina, Japie se oorlede vrou se suster. In “Een aand in Oktober” (1983) word Vera vasgevang in ’n liefdesdriehoek. “Waar jou geluk lê?” (1984) het die lewe van onderwysers as tema. Nadat Bart Visser geskei is, trek hy van die platteland na die stad, waar hy as onderhoof van ’n skool aangestel word. Hier smee hy nuwe vriendskappe en beleef hy saam met die leerlinge ook hulle lief en leed. Uit die staanspoor kry hy egter probleme met die mooi weduwee Elena, wat die hoof se witbroodjie is. Daar is so ’n diep kloof tussen hulle dat hulle selfs as kollegas nie bymekaar kan uitkom nie. “Wie is Elmarie Bessemer?” (1997) is die verhaal van ’n weeskind wat as week-oue baba deur die stasieskoonmaker Jacob in die stasiewagkamer gekry is. Deur die jare gaan kuier Jacob elke Sondag vir haar in die weeshuis. Elmarie weier om te trou, want sy weet nie waarvandaan sy kom nie. Dokter Nelis Jooste is egter net so hardkoppig as sy en weier om op te gee. Sy soektog laat dinge aan die lig kom wat sewe mense se lewens dramaties beïnvloed. Hierdie boek is ’n finalis vir die Ela Spence-prys vir gewilde prosa.[2] In “Haar droomminnaar” (1998) verloor Regina Roux haar ouers en enigste suster in ’n motorongeluk. Sy kom nou weer in aanraking met die polisie-offisier Renier Stander, op wie sy sewe jaar gelede intens verlief was. Hulle is egter uitmekaar toe sy uitgevind het hy is getroud.

Publikasies[wysig | wysig bron]

Jaar Titel
1969 Die voorbladnooi
1970 Bitter Appels
Duet in twee sleutels
1974 Madelief
1975 Ek beloof jou nie my liefde
Die nuwe kookboek in kleur
1977 Die huis op Jasperhoek
1979 My liefde is ’n malvablom
1980 Die ander erfgenaam
1981 Geslote hart
1982 Kranse van Gevonden
1983 Blom van my hart
Een aand in Oktober
Met die vloedgety saam
Soms ’n wonderwerk
Treinrit na vergetelheid
Die tweeling
1984 Daardie jaar op Bekkersput
Rissiepit
Waar jou geluk lê
1985 Frieda
Leon se Liefde
1988 Kreupel Cupido
1989 Vir altyd joune
Vry van gister
Vuurproef van die liefde
1991 Die fluweelrok
’n Handvol Kieseltjies
Die smaragring
1993 Haar droomminnaar
1994 Soetwaters
1996 Die koekoek
1997 Wie is Elmarie Bessemer?
1998 Die Tegoedes van Soeterus
Ter wille van Amanda
2002 Wasdom van die liefde
2003 Elsie se vuurproef[3]

Verwysings[wysig | wysig bron]

  1. http://www.savryskutskrywer.co.za/mediamekka_boekrak_1201.htm
  2. Nieuwoudt, Stephanie “Herna de Villiers skryf om haar ‘kop besig te hou’” “Beeld” 4 Augustus 1998
  3. http://www.worldcat.org/identities/lccn-no98073356/