Hubble-diepveld

in Wikipedia, die vrye ensiklopedie
Jump to navigation Jump to search

Koördinate: Sky map 12h 36m 49.4s, +62° 12′ 58″

Die Hubble-diepveld.

Die Hubble-diepveld (HDV) is ’n foto van ’n klein streek in die sterrebeeld Groot Beer wat saamgestel is uit ’n reeks waarnemings deur die Hubble-ruimteteleskoop. Dit dek ’n gebied van sowat 2,6 boogminute aan elke sy – dit is sowat ’n 24 miljoenste van die hele lugruim, of die grootte van ’n tennisbal op ’n afstand van 100 meter.[1] Die foto bestaan uit 342 aparte beligtings oor 10 opeenvolgende dae tussen 18 en 28 Desember 1995.[2]

Die veld is so klein dat net ’n paar voorgrondsterre van die Melkweg daarin voorkom. Dus is feitlik al 3 000 voorwerpe op die foto sterrestelsels; van hulle is onder die oudste en verste stelsels bekend. Deur so baie jong sterrestelsels te onthul het die HDV ’n landmerkbeeld in fisiese kosmologie geword.

Drie jaar later is ’n streek in die suidelike lugruim op dieselfde manier afgeneem; dit is die Hubble-diepveld-suid. Die ooreenkomste tussen die twee beelde het getoon die heelal is oor groot gebiede eenvormig en dat die Aarde ’n tipiese ruimte in die heelal beslaan.

In 2004 is ’n dieper foto, bekend as die Hubble-ultradiepveld, geneem met ’n beligting van ’n paar maande. Dié beeld was destyds die mees sensitiewe sterrekundige beeld wat ooit by sigbare golflengtes geneem is – tot met die uitreiking van die Hubble Ekstreme Diepveld-foto in 2012.

Verwysings[wysig | wysig bron]

  1. Clark, Stuart (2011). The Big Questions The Universe. Hachette UK. p. 69. ISBN 978-1-84916-609-6.
  2. Ferguson, A.S. (1998). “The Hubble deep field”. Reviews in Modern Astronomy 11: 83–115.

Eksterne skakels[wysig | wysig bron]