ICDL

in Wikipedia, die vrye ensiklopedie
ICDL kenteken
ECDL Profile sertifisering uitgereik in Griekeland in Februarie 2017.

Die International Computer Driving Licence in Europa bekend as die European Computer Driving License is sertifikate wat deur die ECDL Foundation, 'n organisasie sonder winsbejag, toegeken word. In Sub-Sahara Afrika (Zimbabwe uitgesluit) word die ICDL-kwalifikasies deur ICDL South Africa ook 'n organisasie sonder winsbejag bestuur wat deur die CSSA in Suid-Afrika gestig is.

Die kursus behels eksamens in sleutelareas in die veld van Inligtingstegnologie, soos bedryfstelsels, kantoorprogrammatuur soos woordverwerkers, spreivelle, databasisse, kommunikasieprogramme en dies meer.

ICDL Kursus-struktuur[wysig | wysig bron]

Die ICDL-kwalifikasie bestaan uit sewe modules wat as volg daaruit sien:

  1. Basiese begrippe: behels die terminologie, toepassings en gebruik van rekenaars, IT en die samelewing en ander algemene gebruike.
  2. Rekenaargebruik en die bestuur van lêers: behels hoofsaaklik die gebruik van die bedryfstelsel.
  3. Woordverwerking: Sluit al die gewone vaardighede in die verband in asook gevorderde vaardighede soos die insluiting van epos in dokumente en integrasie met spreivelle en grafika.
  4. Spreivelle: Vereis 'n deeglike kennis van die gebruik van spreivelle.
  5. Databasisse
  6. Aanbiedingshulpbronne: Vereis kennis in die gebruik van sodanige programmatuur.
  7. Inligting en kommunikasie: Behels die gebruik van epos programmatuur en die verkryging van inligting oor die internet.

'n Slaagsyfer van 75% moet behaal word in elkeen van die modules om die sertifikaat te bekom.

Doelwit[wysig | wysig bron]

Die doel van die kursus is om die vlak van kennis oor inligtingstegnologie te verhoog en die vlak van bekwaamheid in die algemene gebruik van persoonlike rekenaars en algemene rekenaarprogrammatuur te verhoog vir alle mense in die wêreld. Die mikpunt is om inligting te versprei, om die program te bevorder en te ontwikkel as 'n wêreldwyd erkende kwalifiseringsprogram vir IT-vaardighede om alle mense toe te rus om deel te neem aan die inligtingsamelewing.

Die ECDL-Foundation mik daarna om vennootskappe met professionele rekenaarverenigings wêreldwyd te vorm wat die program kan bestuur in hulle eie plaaslike gemeenskappe.

Die program is in 1997 van stapel gestuur en teen 2005 het soveel as 5 miljoen mense vanuit 138 lande al aan die program deelgeneem. Die program is tans (2006) al in 32 tale vertaal.

Sien ook[wysig | wysig bron]

Eksterne skakels[wysig | wysig bron]