Kaap Columbine
Kaap Columbine is 'n prominente rotsagtige landhoof in die Wes-Kaap, Suid-Afrika. Dit lê aan die suidelikste punt van Paternosterbaai, aan die Suid-Atlantiese Oseaan. Dit vorm die mees westelike punt van die provinsie en is per pad sowat 30 km van Vredenburg en 170 km van Kaapstad geleë. St. Helenabaai is na die noordooste van hierdie kuslyn, en Saldanhabaai na die suide, met etlike kleiner inhamme om die kaap. Die naaste dorpie is Paternoster.
Natuurreservaat
[wysig | wysig bron]
Die kaap word by die Kaap Columbine-natuurreservaat van 263 hektaar ingesluit, en die omgewing is 'n gewilde plek vir wandelings, kampering, voëlkyk en die genieting van kuslandskappe. Tietiesbaai is 2 km suidoos van die kaap, en bied ablusie en kampeergeriewe. Sparkle Bay, Skulpiesbaai, Viskop corner en Birthday Bay word as informele kampeerterreine aangedui, maar bied geen geriewe nie. Sea Shack bied oornaggeriewe, en 'n restaurant, die Seekombuis, is 1 km oos daarvan. Die natuurreservaat en geriewe word deur die Saldanhabaai-munisipaliteit bestuur.
Vuurtoring
[wysig | wysig bron]Die Kaap Columbine-vuurtoring is hier te Castle Rock opgerig. Baie skepe het ter plaatse op die rotse geloop, onder meer die troepedraer St. Lawrence, 'n Portugese stoomskip Lisboa en die barg Columbine - waarna die kaap vernoem is.