Karin Cronjé
Karin Cronjé[2] (*1957, Johannesburg –) is 'n Suid-Afrikaanse joernalis en skrywer.
Lewe en werk[wysig | wysig bron]
Vroeë lewe[wysig | wysig bron]
Karin Cronjé word in Johannesburg[3] groot en voltooi ook daar haar skoolopleiding. Sy studeer verder in drama aan die Universiteit van Pretoria, waar sy 'n B.A. Drama-graad behaal.
Loopbaan as joernalis en skakelbeampte[wysig | wysig bron]
Na universiteit verkoop sy vir 'n kort rukkie versekering waarna sy as joernalis by Hoofstad begin werk, waar P.G. du Plessis destyds die redakteur was. Sy aanvaar na sowat twee jaar in hierdie betrekking 'n pos as joernalis by Radio en TV Dagboek.
Dan trou sy met die bekende Afrikaanse letterkunde dosent Ampie Coetzee en hulle het 'n seun, Marko, maar is later geskei. Hulle vestig hulle in Kaapstad, waar sy as vryskutjoernalis en binnenshuise versierder werk. Na haar egskeiding aanvaar sy in 1995 'n betrekking as skakelbestuurder vir die uitgewer David Phillip, waar sy promosies en publisiteit hanteer.
Loopbaan as opvoeder en skrywer[wysig | wysig bron]
Sy bedank dan na sowat tien jaar hierdie pos om twee jaar in Suid-Korea as Engels onderwyser deur te bring en perspektief te verkry. Hier kom sy eindelik tot self-aanvaarding'.[4] Deurentyd skryf sy aan haar tweede roman. Uiteindelik keer sy in Februarie 2008 terug na Suid-Afrika. Vanaf Februarie 2010 is sy deeltyds as lektor verbonde aan die Universiteit van Stellenbosch, waar sy akademiese geletterdheid en Engels aan plaaslike en buitelandse musiekstudente doseer. Op vryskutbasis help sy met redigering van skrywers van fiksie en nie-fiksie se manuskripte. Sy help onder andere voornemende skrywers om onsekerhede en vrese te oorkom en oplossings te vind vir skryfdilemmas. Deur middel van Skype onderrig sy ook Engels tweede taal aan plaaslike en internasionale kliënte. Hierdie onderrig word verpersoonlik, sodat daar gefokus word op die spesifieke areas wat elke kliënt wil verbeter. Sy bly in Nuweland in Kaapstad.
Skryfwerk[wysig | wysig bron]
Romans[wysig | wysig bron]
Vir 'n pers huis[5][6][7] beskryf die lewe van 'n vrou van 'n groot skrywer, wie se bestaan slegs rondom die man, die kind en die huis wentel. Die innerlike pyn en emosies wanneer hierdie verhouding verbrokkel en die vrou deur die pynlike proses van selfontdekking en selfaanvaarding gaan, word in brutaal eerlike taal beskryf. Min dinge bly ongesê, veral wat die lyflike behoeftes van die vrou betref. Sy probeer ontkom van haar probleme deur oorgawe aan 'n minnaar, 'n violis in 'n orkes, belydenisse teenoor 'n vriendin en die roman of dagboek wat sy aan die skryf is. Die tema van bloed speel dwarsdeur die roman 'n groot rol, terwyl musiek 'n integrale rol speel in haar selfontdekking en uiteindelike bevryding.[4] Die boek word 'n pleidooi vir die emansipasie van die vrou en is 'n aanval op die patriargale bestaan en erfenis van die Afrikaner.
Alles mooi weer[8][9] vertel van die antropologie professor Hilette Barend, wat 'n gevallestudie maak van 'n verdwene pasiënt van Stikland. Dit word duidelik dat daar sekere parallelle tussen hierdie pasiënt en haar eie lewe is, waardeur sy gedwing word om selfontleding te doen. Haar bedrywige lewe is slegs 'n manier om die onnoembare psigiese skade wat sy as kind opgedoen het, te onderdruk sodat sy “normaal” kan funksioneer. Die hoofkarakter beweeg deurentyd op die grens tussen waansin en normaliteit en die roman ondersoek die noodsaaklikheid van die individu om haar donker kant te erken, voordat dit haar inhaal en vernietig. Hierdie donker verhaal word goed deur humor getemper. Alles mooi weer verower in 2009 die Jan Rabie-prys vir innoverende Afrikaanse letterkunde.
Ander skrywerk[wysig | wysig bron]
As Karin Coetzee het sy voorheen die Engelse erotiese kortverhaal This protracted birth laat opneem in die versamelbundel Lyfspel / Body play.
Sy skryf ook haar memoires in Engels, There goes English teacher, wat veral oor haar tydperk as Engels onderwyser en lektor aan 'n privaatskool en universiteit in Suid-Korea handel. Hierdie manuskrip wag nog vir publikasie.
Publikasies[wysig | wysig bron]
- 1998 - Vir 'n pers huis
- 2007 - Alles mooi weer
Ander verwysings[wysig | wysig bron]
- Human, Riekie. Karin skryf uit legkaart van foto’s en papiertjies. Die Burger, 5 Mei 1999.
- Nieuwoudt, Stephanie. Cronjé skryf oor vrou se pynlike selfontdekking. Plus, 17 November 1998.
- Van der Merwe, Romi. Op die man af. Rooi Rose, 31 Maart 1999.
- Human, Riekie. Die Burger: http://152.111.1.87/argief/berigte/dieburger/1999/05/05/7/4.html
- Nieuwoudt, Stephanie. Volksblad: http://152.111.11.6/argief/berigte/volksblad/1998/12/12/9/4.html
Verwysings[wysig | wysig bron]
- ↑ LinkedIn: https://www.linkedin.com/in/karin-cronje-2a02a422[dooie skakel]
- ↑ Kannemeyer, J.C. Die Afrikaanse literatuur 1652-2004. Human & Rousseau. Kaapstad en Pretoria; Eerste uitgawe, 2005.
- ↑ Van Coller, H.P. (red.) “Perspektief en Profiel Deel 3” Van Schaik-Uitgewers Pretoria; Eerste uitgawe 2006
- ↑ 4,0 4,1 Retief, Hanlie Rapport: http://152.111.1.87/argief/berigte/rapport/2008/09/16/RH/21/cronje.html[dooie skakel]
- ↑ Brink, André P. Insig. November 1998.
- ↑ Hambidge, Joan. Rapport, 25 Oktober 1998. http://joanhambidge.blogspot.co.za/2013/03/karin-cronje-vir-n-pers-huis-1998.html
- ↑ Wybenga, Gretel. Beeld, 7 Desember 1998.
- ↑ Hambidge, Joan: http://joanhambidge.blogspot.co.za/2013/02/karin-cronje-alles-mooi-weer-2008.html
- ↑ Steinmair, Deborah. Rapport, 20 Julie 2008.