Kennetjie

in Wikipedia, die vrye ensiklopedie
Spring na: navigasie, soek

Kennetjie is 'n kinderspel wat gewoonlik deur seuns gespeel word. Aangesien die spel redelik gevaarlik is, is dit gereeld deur skoolhoofde van die speelgrond verban. Dit is 'n ingewikkelde spel met baie reëls.

Reëls en speelwyse[wysig | wysig bron]

Die spel word gespeel met 'n dun stok wat 1 voet (±30.5 cm) lank is wat as kolf dien. 'n Korter stok van 4 duim (±10cm) lank word die kennetjie genoem en dien as die bal. Die kolf en kennetjie word gewoonlik uit 'n ou besemstok gesaag. 'n Slootjie, gewoonlik die gaatjie genoem, so 6 duim lank en nie dieper as een duim nie word in die grond gemaak en die kennetjie daaroor geplaas. Die gaatjie se punte moet skuins uitloop. Die eerste speler (kolwer) slaan dan die kennetjie met die langer stok van die gatjie af so ver as moontlik, as die kennetjie gevang word sonder om die grond te raak is die kolwer se beurt verby. Een van die veldwerkers gooi die kennetjie terug en probeer om so na as moontlik aan die gaatjie te land, as hy in die gatjie land is die kolwer se beurt verby. Die kolwer kan die kennetjie wegslaan voor dit te ruste kom, maar sodra dit stop meet hy met sy slaanstok hoeveel lengtes van die gaatjie die kennetjie is. Hoe nader die kennetjie aan die gaatjie is, hoe moeiliker hou moet die kolwer dan uitvoer wanneer hy die volgende hou moet uitvoer. As die kolwer die kennetjie mis slaan tydens die uitvoer van 'n hou is sy beurt verby.[1]

Aantal stoklengtes Hounaam Aksie
< 1 Kennetjie Die kennetjie word op die ken geplaas of onder die ken vasgeknyp, laat val en dan weggeslaan.
> = 1 , < 2 Toontjie Die kennetjie word op die tone of skoenpunt geplaas, opgeskop en weggeslaan.
> = 2 < 3 Tip-Top Die kennetjie word tussen die duim en wysvinger van die vryhand in die lug gehou, met die slaanstok die lug ingetik en dan met 'n tweede hou weggeslaan.
> = 3 < 4 Vuisie Die kennetjie word op die vuis van die vryhand gebalanseer, die lug ingegooi en weggeslaan.
> = 4 < 5 Bokkie Die kennetjie word tussen die pinkie en wysvinger van die vryhand in die lug gehou, met die slaanstok die lug ingetik en dan met 'n tweede hou weggeslaan.
> = 5 < 6 Ogie Die kennetjie word op die slaner se oog (of op sy bril) gebalanseer, laat val en weggeslaan.
> = 6 < 7 Oortjie Die kennetjie word op die oor gebalanseer, laat val en weggeslaan.
> = 7 < 8 Ellie Die vry arm word horisontaal gelig en die hand na die bors gebring, die kennetjie word dan op die gebuigde elmboog geplaas, die lug ingeskiet of laat val en weggeslaan.
> = 8 Elter 'n Punt word deur vir die slaner se span behaal. Daar word dan verder van een af getel om die slaanhou te bepaal - minder as een stoklengte = kennetjie, een maar nie twee nie = toontjie, ens. Daar kan daar weer tot agt stoklengtes getel word, dit wil sê 'n totaal van sestien, kry die slaner se span nog 'n elter (punt) by en so word die proses herhaal tot by die kennetjie.
* Optik-en-slaanhou Die kennetjie word enige plek op die grond in die slaanhok neergeplaas, met die slaanstok getik sodat dit opwip die lug in en dan met 'n tweede hou die veld ingeslaan.

Sien ook[wysig | wysig bron]

Verwysings[wysig | wysig bron]