Müller-Thurgau

in Wikipedia, die vrye ensiklopedie
Müller-Thurgau

Müller-Thurgau is 'n wit druiwesoort wat vars en ligte wyne oplewer. Om regs- en bemarkingsredes word na die kultivar ook as Rivaner verwys.

Müller-Thurgau is 'n taamlik jong kultivar wat in 1882 deur die Switserse wynnavorser Hermann Müller (1850–1927), wat aan die Duitse navorsingsinstituut Geisenheim in die Rheingau verbonde was, gekweek is. Sy naam is afgelei van Müller se van en sy Switserse geboortekanton, Thurgau.

Die kultivar word tans op 42 000 hektaar wingerd verbou en maak van Müller-Thurgau die suksesvolste nuutgekweekte kultivar ter wêreld. Een van Müller se oorspronklike steggies het in Wädenswil in Switserland bewaar gebly. Meer onlangse genetiese ondersoeke het gestaaf dat Müller sy sukses met 'n kruising van Riesling en Madeleine royale behaal het.[1] In die Switserse navorsingsinstituut te Wädenswil is Müller se nuwe kultivar verder ontwikkel en in 1913 na hom vernoem. Die sinoniem Rivaner is 'n afkorting van Riesling en Silvaner, twee kultivars wat oor 'n lang tydperk as die genetiese "ouers" van Müller-Thurgau beskou is.

Verwysings[wysig | wysig bron]

  1. "Deutsches Weininstitut: Müller-Thurgau (Rivaner)". Geargiveer vanaf die oorspronklike op 6 Julie 2014. Besoek op 23 Februarie 2014.