Oekraïense Gewapende Magte

Embleem van die Oekraïense gewapende magte.

Die Oekraïense Gewapende Magte (Oekraïens: Збройні сили України [ЗСУ]; Zbroini sili Oekrajini, [ZSU]) is die militêre magte van die Oekraïne. Hulle is die vernaamste verdedigingsmag teen enige aggressie teen die soewereine staat Oekraïne. Alle militêre en veiligheidsmagte, insluitend die gewapende magte, is onder die bevel van die president van Oekraïne en onderhewig aan toesig deur 'n permanente Werchowna Rada- parlementêre kommissie.

Oekraïne se gewapende magte is saamgestel uit die Oekraïense Grondmagte, die Oekraïense Lugmag, die Oekraïense Vloot, die Oekraïense Lugstormmagte, die Spesiale Operasionele Magte en die Oekraïense Onbemande Stelselmagte. Oekraïne se vloot sluit sy eie Oekraïense vlootinfanterie, sowel as Oekraïnse vlootlugvaart in. Die Territoriale Weermag dien as die militêre reserwemag en in gevalle van oorlog kan dit massagemobiliseer word vir burgerlike vrywilligers om in plaaslike verdediging te dien. Die Oekraïense Kuswag is die kuswagdiens van Oekraïne, maar dit is deel van die grenswagdiens en nie van die vloot nie. Die Oekraïense Lugverdedigingsmagte was 'n tak verantwoordelik vir lugafweeroorlogvoering vanaf 1991 totdat dit in 2004 met die lugmag saamgesmelt is.

As gevolg van die Russiese militêre ingryping in Oekraïne in 2014, het die president die goewerneurs van oblaste van Oekraïne opdrag gegee om vrywilligerseenhede onder die regering se Territoriale Verdedigingsmagte te skep. Aanvanklik het hierdie eenhede minimale befondsing uit streeksbegrotings ontvang en meestal op skenkings staatgemaak. In November 2014 is die meeste van die territoriale verdedigingsbataljons by die Oekraïense grondmagte ingelyf. Die Nasionale Wag van Oekraïne dien as 'n paramilitêre reserwekomponent van die gewapende magte van Oekraïne.

Na vyandelikhede met Rusland in 2014, het Oekraïne die grootte van sy gewapende magte vergroot tot 204 000 soldate (+46 000 staatsamptenare), sonder bykomende magte soos die grenswagte (53 000), die nuutgestigte Nasionale Wag van Oekraïne (60 000) of die sekuriteitsdiens. In 2021 maak die grootte van Oekraïne se gewapende magte, wat uit 246 445 (195 626 militêre personeel) bestaan, dit die tweede grootste in die streek ná die Russiese gewapende magte. In 2022 het president Wolodimir Zelenski 'n vergroting van die magte met 100 000 teen 2025 gelas, terwyl diensplig in 2024 beëindig sou word. Diensplig sou vervang word met korttermyn- intensiewe militêre opleiding.