Oliver Tambo-huis

Oliver Tambo-huis is die ampswoning van die Adjunkpresident van Suid-Afrika. Dit is geleë op die hoek van Kerkstraat (nou Stanza Bopapestraat) en Dumbartonweg in Bryntirion in Pretoria.

Die huis, oorspronklik bekend as Overvaal, is in 1937 gebou as ampswoning vir die administrateur van die destydse Transvaalprovinsie. Dit is ontwerp deur J.B. Dey en V.S. Reese-Poole, ‘n oud-medewerker van sir Herbert Baker. Op versoek van die eerste bewoner is dit gebou in die Kaaps-Hollandse herlewingstyl. Aanvanklik het die dubbelverdiepinggebou ‘n rietdak gehad, maar dit is later jare met leiklip vervang.

In die huis word ‘n pragtige kunsversameling gehuisves: skilderye deur o.a. Pierneef, Tinus de Jongh en Erich Mayer en beeldhouwerke deur o.a. Anton van Wouw. Van Wouw se “President Kruger in ballingskap” en “Op Brandwag” is daar te sien. Verder is daar antieke meubels, koperware, keramiek en ander kunsvoorwerpe. Reese-Poole het ook die besondere tuin uitgelê.

Bibliografie

• Over-Vaal, die geskiedenis van ‘n ampswoning. Lantern, Desember, 1963
• Standard Encyclopaedia of Southern Africa, deel 8. Kaapstad: Nasou, 1973. ISBN 0-625-00324-1