Reklame-agentskap

in Wikipedia, die vrye ensiklopedie

'n Reklame-agentskap is 'n diensmaatskappy wat advertensies skep, beplan en bestuur namens kliënte. Die advertensies kan verskeie vorms aanneem en dit kan ook 'n reeks advertensies behels, 'n reklameveldtog. Die reklame-agentskap is onafhanklik van die kliënt en neem 'n buitestaander se oogpunt aan in die poging om die kliënt se produkte of dienste te verkoop. 'n Agentskap kan ook oorkoepelende bemarkingstrategieë, handelsmerkstrategieë en promosies namens kliënte hanteer.

Tipiese reklame-agentskappe sluit besighede en korporasies, maatskappye sonder winsoogmerk, en regeringsagentskappe in. Reklame-agentskappe wissel van klein bedrywe met een of twee mense in diens tot groot multinasionale, multiagentskap konglomerate soos Omnicom Group, WPP Group, Interpublic Group of Companies en Havas.

Sommige agentskappe spesialiseer in spesifieke soort advertensies, soos byvoorbeeld gedrukte advertensies of televisie-advertensies. Ander agentskappe, veral die groteres, lewer werk vir 'n verskeidenheid media. In die laasgenoemde geval, skep die agentskap geïntegreerde markkommunikasie, of oor-die-lyn reklame. Die "lyn" is die tradisionele merker tussen media wat tradisioneel kommissie aan die agentskap betaal en media wat geen kommissie aan die agentskap betaal nie.

Deesdae klassifiseer sommige mense firmas wat soekenjinbemarking en soekenjinoptimering doen as "agentskappe" omdat hulle media skep. Studies dui daarop dat hierdie soort bemarking tydskrifadvertensies sal oortref binne die volgende 3 tot 5 jaar.

Nie alle reklame word deur agentskappe geskep nie. Sommige maatskappy skep hulle eie reklame; hulle werk intern.

Agentskappersoneel[wysig | wysig bron]

Die kreatiewe department – die mense wat die advertensies uitdink en skep – is die kern van 'n reklame-agentskap. Moderne reklame-agentskappe verdeel gewoonlik hulle personeel in kreatiewe spanne bestaande uit 'n kopieskrywers en 'n kunsdirekteur. Hierdie spanne kan permanent wees, of per projek saam werk. Die kunsdirekteur en kopieskrywer is ondergeskik aan 'n kreatiewe direkteur; gewoonlik iemand met 'n aantal jare ervaring in die bedryf. Ten spyte van hul titels, werk die kunsdirekteur en die kopieskrywer beide aan die teks en die grafika van 'n voorstel – die advertensie of veldtog se sleutelboodskap. Kreatiewe personeel werk dikwels saam met eksterne ontwerp- of produksiestudio's om hulle idees te ontwikkel en te implementeer.

Die ander belangrike department in reklame-agentskappe is rekeningdienste of rekeningbestuur. Hierdie personeel werk direk met kliënte en potensiële kliënte om besigheid te kry en om uit te vind wat die kliënt benodig en verwag van die agentskap. Hulle moet die kliënt se besigheid verstaan die kliënt se behoeftes binne die agentskap verteenwoordig. Sodoende kan die advertensies aan die behoeftes van die kliënt voldoen.

Voorheen het kliëntdienspersoneel die advertensiestrategie geskryf en kreatiewe personeel het hierdie strategie gebruik om advertensies te skep. Sedert die Sestigerjare (in Brittanje) en die Tagtigerjare (in die VSA) verrig spesialisrekeningbeplanners hierdie taak. Die rekeningbeplanner het aanvanklik die verbruiker verteenwoordig en moes die beste manier vind om die kliënt se produkte aan verbruikers voor te lê. Om dit te kan doen, moes rekeningbeplanners verbruikers se behoeftes goed verstaan en hulle moes weet hoe om met verbruikers te praat. Vandag het beplanners 'm aansienlik groter rol; hulle bepaal strategieë vir handelsmerke en, tot 'n sekere mate, strategieë vir media. Hulle gebruik hul insig in verbruikers om te bepaal wanneer verbruikers ontvanklik is vir boodskappe en hoe om hierdie boodskappe oor te dra.

Die kreatiewedienste-departement is minder bekend; hierdie personeel is in verbinding met die leweraars van die verskillende kreatiewe media. Hulle sal byvoorbeeld onderhandel met drukkers as die agentskap brosjures wil laat druk vir 'n kliënt. In die geval van uitsaaimedia, buitemuurse media en die pers, vervul 'n media-agentskap gewoonlik hierdie rol. Die media-agentskap help met mediabeplanning en is gewoonlik groot genoeg om vir beter pryse te onderhandel as wat 'n enkele reklame-agentskap kan.

In klein agentskappe kan dieselfde personeel beide kreatiewe en rekeningdienste lewer. Groter agentskappe het mense wat spesialiseer in die een diens of die ander.

'n Belangrike departement in 'n reklame-agentskap is verkeer. Hierdie departement verbeter produktiwiteit en winsgewendheid deur ontoepaslike werkopdragte te identifiseer, inligting in die agentskap te versprei en kosteramings te evalueer. In klein agentskappe is een persoon dalk verantwoordelik om werkvloei te bestuur, om kosteramings te versamel en om die telefoon te antwoord. Groot agentskappe kan verkeersdepartemente met tien of meer werknemers hê.

Beroemde reklame-agentskappe[wysig | wysig bron]

  • BBDO – werk saam met Anheuser-Busch, Visa, en PepsiCo.
  • Crispin Porter + Bogusky – beroemd vir Subservient Chicken, werk saam met Burger King, Virgin Atlantic Airways, Volkswagen
  • Doyle Dane Bernbach – het beroemde veldtogte vir Volkswagen geskep (insluitend die beroemde "Suurlemoen"-advertensie) en vir Avis Rental Cars ("We're number 2. We try harder.")
  • Goodby Silverstein & Partners – beroemd vir die "Got Milk?"-veldtog, en ander.
  • JWT (voorheen J. Walter. Thompson) – werk saam met Kelloggs, Unilever, Diageo.
  • The Martin Agency -- UPS, GEICO, NASCAR, Miller (Lite, MGD), Hanes, en ander.
  • N.W. Ayer & Son – die eerste agentskap in die Verenigde State, het "When it rains it pours" geskep (Morton Salt), "A diamond is forever" (De Beers), "Reach out and touch someone" (AT&T), "Be all you can be" (Verenigde State se Weermag), en ander.
  • Ogilvy & Mather – beroemd vir die gedrukte Rolls-Royce-advertensie met die opskrif "At 60 miles an hour the loudest noise in this new Rolls-Royce comes from the electric clock", onder andere.
  • Saatchi and Saatchi – mees beroemd vir hul werk saam met die Konserwatiewe Party van die Verenigde Koninkryk, veral gedurende die algemene verkiesing in 1979 (Maurice and Charles Saatchi het die agentskap later verlaat en M&C Saatchi gestig)
  • TBWA\Chiat\Day – werk saam met Apple Computer (insluitend die "Think Different"-veldtog), adidas, en Sony Playstation. Het die fcuk-merk geskep en (in die VK) Wonderbra-advertensies.
  • Partnership Advertising – het die "loading cancer"-advertensie geskep wat die 2003 New York Festivals Finalists gewen het.

Die grootste reklamegroepe[wysig | wysig bron]

Volgens die Research Company Evaluating the Media Agency Industry, was die volgende die 6 grootste groepe (gerangeer volgens wêreldwye besigheid) in 2004:

  • WPP Group: $48 055 miljard
  • Publicis: $34 365 miljard
  • Interpublic Group: $27 870 miljard
  • Omnicom Group: $25 230 miljard
  • Aegis Group: $20 355 miljard
  • Havas: $8 775 miljard

Eksterne skakels[wysig | wysig bron]