Ruïne Besserstein
Die Ruïne Besserstein is die oorblyfsels van 'n sogenaamde "Spornburg" in Switserland (wat op 'n kliprif gebou is sodat die kasteel ten minste aan twee kante deur natuurlike kranse beskerm word). Dit is op die gebied van die munisipaliteit van Villigen in Kanton Aargau geleë – op 'n hoogte van 550 meter bo seespieël op die hang van die Geissberg. Vandag is dit is erg vervalle en is daar slegs enkele murasies oor.
Geskiedenis[wysig | wysig bron]
Dit is onbekend wanneer en deur wie die kasteel gebou is. Dit word vir die eerste keer in 'n dokument uit 1244 genoem. Dit was toe die eiendom van die klooster van Murbach. Dit was deel van die landgoed Rein wat aan die klooster behoort het. Volgens geskrifte het 'n ontmoeting op 13 Februarie 1259 in die kasteel tussen hertog Rudolf van Habsburg en sy neef Gottfried von Habsburg-Laufenburg plaasgevind. In April 1259 laat vaar hulle hul eise teen die landgoed St. Amarintal in die Vogese-berge ten gunste van die klooster van Murbach. In 1291 word die landgoed aan die Habsburgers verkoop, en so het die kasteel ook in hul besit gekom. In die jaar 1305 word reeds genoem dat die kasteel onbewoon was.
Die uitleg van die kasteel[wysig | wysig bron]
Die kasteel is op die oostelike rand van 'n rotsrif op die Geissberg geleë. Na die weste toe word die kasteel deur 'n wal beskerm wat 200 meter lank en vandag nog ongeveer 4 meter hoog is. Voor die wal is daar nog 'n diep verdedigingssloot. Die murasies waarvan slegs die voetstuk van die toring sigbaar is dek 'n gebied van ongeveer 45 maal 25 meter.
Eksterne skakels[wysig | wysig bron]
- Informationen über die Burg Besserstein auf der Website des Kantons Aargau (pdf)[dooie skakel] (448 kB)
- Ruine Besserstein im Online- Denkmalschutzinventar des Kantons Aargau