Seven Sisters, Sussex

Die Seven Sisters

Die Belle Tout-vuurtoring op Beachy Head is in 1832 gebou en in 1902 buite bedryf gestel aangesien dit dikwels in digte mis gehul was en deur erosie bedreig is. Gedurende die Tweede Wêreldoorlog is dit beskadig en in die 1950's heropgebou. In 1996 is dit 17 meter landinwaarts verskuif. Tans dien dit as gasteverblyf

Die Seven Sisters is 'n reeks wit kranse langs die Engelse Kanaal. Hulle maak deel uit van die South Downs, 'n reeks van krytheuwels wat oor 'n gebied van 670 km² (260 vierkante myl) in drie graafskape langs die suidweskus van Engeland strek (Hampshire, Wes- en Oos-Sussex) - vanaf die Itchen Valley in Hampshire in die weste tot Beachy Head in Oos-Sussex in die ooste. Sowat 8 500 jaar gelede het die krytlandskappe nog tot Frankryk gestrek voordat reusegolwe van seewater die Engelse Kanaal gevorm en Groot-Brittanje van die vasteland afgesny het.

Die Seven Sisters is in die Nasionale South Downs-park geleë wat deur die Kanaalkus, die Cuckmere-rivier en die A259-pad begrens word. Die kranse is die oorblyfsels van droë valleie in die South Downs wat oorspronklik deur riviere in die krytrots gesny is en tans geleidelik deur die see geërodeer word. Die Seven Sisters Country Park, wat in die oostelike hoek van die nasionale park gestig is, is tans 'n gewilde bestemming vir uitstappies. Staproetes langs die kranse lei na die vuurtoring Belle Tout en die klein gehuggie Birling Gap wat intussen deur erosie van sowat een meter per jaar bedreig word (en waar enkele huise al verlore gegaan het). Hier bied 'n trap toegang tot die strand wat 'n uitsig oor die Seven Sisters bied. Enkele honderd meter verder landinwaarts is die bosgebied Friston Forest geleë wat gewild is by staptoeriste en bergfietsentoesiaste.

Terwyl veerbootpassasiers uit Calais die wit kranse van Dover as die eerste punt van die eiland Groot-Brittanje waarneem, is dit vir reisigers, wat in Dieppe aan boord gaan, die Seven Sisters. Die kranse van Dover word intussen kunsmatig begroen word om hulle teen verdere erosie te beskerm en sodoende hul kenmerkende wit kleur weens die plantegroei gedeeltelik ingeboet het, word die Seven Sisters in hul oorspronklike toestand bewaar. So word hulle dikwels in plaas van Dover se kranse as toneel vir televisiereekse en rolprente gekies.

Waarskuwing

Besoekers moet versigtig wees as hulle die kranse besigtig en in elk geval afstand hou van die afgrond - die krytrotse is onstabiel en uiters gevaarlik. In 2017 het 'n 23-jarige student uit Suid-Korea sestig meter na haar dood geval toe sy 'n foto wou neem.

Die kranse

Die trap na die strand in Birling Gap. Dit is, soos die dorpie, in besit van die National Trust

Op die rand van die afgrond: huise in Birling Gap

Die naam Seven Sisters is afgelei van die oorspronklik sewe rotspieke wat elkeen ook sy eie naam dra, net soos die klowe daartussen (sedert die 16de eeu, toe die huidige naam aan die destyds sewe kranse gegee is, het erosieprosesse 'n agste piek gevorm). Hulle is, van wes na oos, met die klowe in skuinsdruk:

• Haven Brow
• Short Bottom
• Short Brow
• Limekiln Bottom
• Rough Brow
• Rough Bottom
• Brass Point
• Gap Bottom
• Flagstaff Point (wat sy vortsetting in Flagstaff Brow vind)
• Flagstaff Bottom
• Flat Hill
• Flathill Bottom
• Baily's Hill
• Michel Dean
• Went Hill Brow

Eksterne skakels

National Trust

• Birling Gap and the Seven Sisters

Beachy Head en Belle Tout-vuurtoring

• YouTube.com: BBC News, 17 Maart 1999: Vuurtoring word landinwaarts verskuif
• YouTube.com: Beachy Head en Belle Tout-vuurtoring in lugopnames (Sussex By Air)