Sluikhandel

in Wikipedia, die vrye ensiklopedie
Spring na: navigasie, soek
Graffiti, 2008

Sluikhandel, ook die swartmark of smokkel(handel), is die sakesektor waarin onwettige ekonomiese transaksies plaasvind, veral die onwettige koop en verkoop van handelsware. Die goedere kan self onwettig wees, soos die verkwansel van verbode wapens of die onwettige dwelmhandel. Die koopware kan gesteel wees of dit kan wettige goedere wees wat onwettig verkoop word om belasting te ontduik of te vermy, soos sigarette en ongeregistreerde vuurwapens. Ook minimum- en maksimumpryse kan lei tot die ontstaan van sluikhandel, soos roofkopiëring (pirating) van musiek, video's of rekenaarprogrammatuur. Die naam sluikhandel het ontwikkel uit sluik, as vervorming van sluip.

Die swartmark ontwikkel glo wanneer die staat bepalings en beperkings op die produksie of die lewering van goedere en dienste instel, wat stremming plaas om die (hoë) aanvraag te voorsien. Hierdie markte bloei wanneer die staatsbeperkinge, soos tydens 'n verbod of rantsoenering, streng toegepas word. Tog is smokkelhandel binne elke ekonomie 'n normale verskynsel. Die smokkelaars se doel is om die maksimum wins te maak uit skaars goedere wat nie op die rakke maklik verkrygbaar is nie of gans te duur is vir die algemene koper.