Sodwanabaai

Sodwanabaai

Ligging van Sodwanabaai in Suid-Afrika

Sodwanabaai is 'n baai aan die Indiese Oseaan in KwaZulu-Natal, Suid-Afrika. Die St. Thomas het in 1589 hier gestrand. Die baai is in 1888 opgemeet om die geskiktheid as 'n hawe te bapaal. Die planne is laat vaar toe 'n hawe by Richardsbaai 120km verder suid ontwikkel is. Die baai is nou deel van die iSimangaliso-vleilandpark. Jesser Point dui die suidelike landhoof aan van die baai.

Daar is onbeskadigde koraalriwwe en 'n groot verskeidenheid oseaanlewe in die baai. Die baai is bekend vir sy hengel, ryk voëllewe, skubaduik en die waterskilpaaie wat hier nes maak.

Skubaduik

Sodwana is ideaal vir haai- en klipbank-duike reg deur die jaar. Meer as 1200 visspesies word in Sodwana aangetref, insluitend haaie, dolfyne en walvisse. Die klipbanke is ongeveer 18 meter diep. Sigbaarheid onder die water is oor die algemeen goed en wissel van tien tot veertig meter. Die water se temperatuur wissel van 21°C in die winter tot 28°C in die somermaande. Duikers het 3mm of 5mm duikpakke nodig.

Selakant

In November 2000 en Mei 2001 het 'n groep duikers onder die leiding van Pieter Venter drie Selakante (Latimeria chalumnae) afgeneem in Jessor Canyon sowat in 110m onder die see.

Fotogalery

• 
  'n Bloed-snapper by Sodwanabaai gefotografeer.
• 
  'n Kool-papegaaivis by Sodwanabaai afgeneem.

Bronne

• Op Pad in Suid-Afrika. B.P.J. Erasmus 1995 ISBN 1-86842-026-4
• Padlangs deur Suid-Afrika. Struik. 2010. ISBN 978-1-77007-751-5
• Coastal Fishes of Southern Africa. Phil & Elaine Heemstra. 2004. ISBN 1-920033-01-7

Eksterne skakels

• (en) Inligting oor Sodwanabaai