Leeudoringstad-spoorwegramp

Die Leeudoringstad-spoorwegramp in 1932 is een van die grootste ontploffings wat ooit in Suid-Afrika plaasgevind het.

Elke Vrydag het ‘n trein, met dinamiet vervaardig by die De Beers-plofstoffabriek in Somerset-Wes, vanaf die stasie by Firgrove na die goudmyne van die Witwatersrand gery.

Op Sondag 17 April 1932 het hierdie trein soos gebruiklik verby die plaas Louwpan, skaars ‘n kilometer wes van Leeudoringstad verbygegaan. Die vrag het bestaan uit 34 waens van 312 ton bestaande uit dinamietkerse in kissies, lont en slagdoppies. Verder was daar ses waens met kunsmis en twee met appels.

Waarskynlik het oorverhitting van ‘n as die brand veroorsaak. In die ontploffing wat daarop volg, sterf vyf mense en word elf ernstig beseer. ‘n Kudde van 25 beeste vrek. Byna geen gebou in die dorp bly skadeloos nie en amper die hele dorp is naderhand oorgebou. ‘n Sloot van 30m en soms tot 5m diep was die gevolg sowel as die verlies van 300m spoorlyn. Wrakstukke van die trein is tot 10km ver van die ramptoneel aangetref en die slag is tot sover as as Kokstad en Pietersburg gehoor.

As hierdie ontploffing slegs enkele minute later moes gebeur het, was die hele Leeudoringstad uitgewis en sou die lewensverlies besonder hoog gewees het.

Bibliografie

• eensgesind.com/leeudoringstad-en-die-trein-van-onheil