Chinon

'n Uitsig oor Chinon en die kasteel Château Chinon

Chinon met die Vienne-rivier

Château Chinon: Die koninklike woongebou

Chinon is 'n Franse stad in die département Indre-et-Loire van die administratiewe gewes (région) Centre met 'n oppervlak van 39 vierkante kilometer en 8 169 inwoners (1999). Chinon dien naas Loches as een van die onderprefekture van die département.

As deel van die historiese landskap Touraine, wat ook dikwels die "tuin van Frankryk" (Frans: le jardin de la France) genoem word, het Chinon die bynaam "blom van die tuin van Frankryk" (la fleur du jardin de la France) gekry.

Chinon, wat aan die oewers van die Vienne-rivier lê, staan daarnaas bekend vir die indrukwekkende bouvalle van sy kasteel en sy moderne kernkragsentrale met vier aktiewe hoëdrukreaktors en drie magnoxreaktors wat intussen buite werking gestel is.

Geskiedenis

Vroeë nedersettings

Die eerste menslike nedersettings in die gebied van Chinon het in die Jongsteentydperk ontstaan. Die Gallies-Keltiese oppidum, wat later hier bestaan het, is in die Romeinse periode tot 'n castrum uitgebou. Die eerste Christene in Chinon het Brictius van Tours (Frans: Brice, omtrent 370-444), 'n aanhanger van Maarten van Tours wat die kerk Sint-Maarten gestig het, en Mexme, die stigter van 'n kerk en klooster, ingesluit. Die eerste historiese verwysing na Chinon as Caino dateer uit die 6de eeu en verskyn in 'n dokument van Gregorius van Tours (omtrent 538-595).

Vroeë versterkings van die Château Chinon

Die plato van Chinon, wat bo-oor die Vienne-rivier verrys, vernou teen die rivierkant. Die Romeine het reeds die strategiese posisie van die plek besef en hier 'n versterking opgerig. Oor 'n tydperk van tien eeue was die plato die toneel van tragiese gebeurtenisse. In 845 is Chinon deur die Wiking-hoof Hasting geplunder..

Drie bekende boumeesters van versterkings het hul stempel op die huidige kasteel afgedruk - twee konings van Engeland, Hendrik II en Richard Leeuehart, en een Franse heerser, Filips Augustus. Die laasgenoemde het die kasteel in 1205 ná 'n beleg van agt maande van die Plantagenêts verower.