Samsung Groep

Samsung (Koreaans: Drie Sterre) is die grootste konglomeraat (Koreaans: Chaebeol) in Suid-Korea, wat met sy meer as 250 000 werknemers ten opsigte van omset (meer as 100 miljard VSA-dollar in 2003) en markwaarde (meer as 77 miljard VSA-dollar in laat 2005) ook tot die vyf grootste ondernemings ter wêreld behoort, met dogtermaatskappye in 58 lande.

Samsung betaal in Suid-Korea meer as 46 miljard ZAR belasting (sowat agt persent van die staatsinkomste) en lewer 'n vyfde van die land se uitvoere op. Die voorsitter van Samsung is Lee Kun-hee.

Geskiedenis

Die onderneming is op 1 Maart 1938 deur Lee Byung-chull as 'n kruidenierswinkel in die stad Daegu gestig. Ná die Koreaanse Oorlog het die maatskappy sy bedrywighede uitgebrei na die boubedryf en voedselverwerking. Dit het die eerste industriële koringmeul en suikersuiweringsfabriek in Korea opgerig, wat tot die land se grootste voedselvervaardiger gegroei het.

Met sy filiaal Samsung Electronics, wat in 1969 gestig is, het Samsung ook elektroniese verbruikersware begin vervaardig. Teen die tagtigerjare was Samsung Electronics 'n tyd lank die grootste vervaardiger van draagbare televisiestelle. In hierdie tydperk het die Suid-Koreaanse regering Samsung aangemoedig om halfgeleiers te ontwikkel.

Ander afdelings van Samsung sluit masjienbou, motors (Hyundai), assuransies, groothandel, eiendomme en vermaak in. Die Munhwa-uitsaaikorporasie, wat in die sewentigerjare die land se grootste private televisiestasie beheer het, is as gevolg van politieke druk aan die staat verkoop.

As gevolg van die ekonomiese krisis in Asië het Samsung in die negentigerjare talle bedrywighede gestaak en 'n aantal dogtermaatskappye verkoop om sy kapitaalbasis te verhoog. Tegelykertyd het Samsung begin om hom op sy kernbedrywighede toe te spits. Samsung Electronics is tans die belangrikste tak van die konglomeraat. Minder bekend op die internasionale markte is Samsung se assuransies, swaar nywerhede en skeepsbou, chemiese nywerhede en Samsung Renault Automobile, 'n koöperasie met die Franse motorvervaardiger Renault.

Borgskappe

Samsung beskik oor sy eie sportspan in Suid-Korea, "Samsung Khan".

Samsung in Suid-Afrika

Samsung Electronics het sy internasionale bedrywighede in 1991 ook na Suid-Afrika uitgebrei. Aanvanklik het die onderneming sy produkte onder die naam Etron aangebied, en in April 1995 is die naam gewysig na Samsung Electronics South Africa. Samsung se beleggings in die land beloop 32 miljoen VSA-dollar (231 miljoen ZAR). 'n Bykomende tien miljoen VSA-dollar (72 miljoen ZAR) is deur die Suid-Koreaanse hoofkwartier aan plaaslike reklame-aktiwiteite bestee. Die onderneming spits hom in Suid-Afrika veral op selfone, televisiestelle, DVD-spelers, mikrogolfoonde en koelkaste toe.

Dogtermaatskappye van Samsung

Elektroniese nywerhede Samsung Electronics Samsung Electro-Mechanics Samsung SDI Samsung Corning Samsung SDS Samsung Networks Samsung Corning Precision Glass Samsung Mobile Masjienbou en swaar nywerhede Samsung Heavy Industries Samsung Techwin Chemie Samsung Total Petrochemicals Samsung Petrochemicals Samsung BP Chemicals Samsung Fine Chemicals Cheil Industries

Finansiële dienste Samsung Life Insurance Samsung Fire & Marine Insurance Samsung Card Samsung Securities Samsung Investment Trust Management Samsung Venture Investment Samsung Corporation Boubedryf Samsung Engineering & Construction Vermaaklikheidsbedryf Suwon Samsung Bluewings Samsung Everland Samsung Lions Samsung Khan Ander Samsung Economic Research Institute Cheil Communications S-1 Renault Samsung Motors

Eksterne skakels

• Samsung se internasionale webwerf