Wladimir Lenin

Wladimir Lenin
Voorsitter van die Raad van die Kommissarisse van die Mense
Ampstermyn 8 November 1917 – 21 Januarie 1924
Voorafgegaan deur	Alexander Kerensky (as President van die Voorwaardelike Regering)
Opgevolg deur	Alexei Rykof (Jozef Stalin as party-leier)
Leier van die Bolsjewiek Party
Ampstermyn 17 November 1903 – 21 Januarie 1924
Voorafgegaan deur	Geen
Opgevolg deur	Jozef Stalin (as Algemene Sekretaris)
Persoonlike besonderhede
Gebore	22 April 1870 Simbirsk, Russiese Ryk
Sterf	21 Januarie 1924 Gorki, Russiese SFS, Sowjetunie
Politieke party	Bolsjewiek Party
Eggenoot/-note	Nadezhda Krupskaja
Professie	Politikus, Revolusionêr, Regsgeleerde
Religie	Geen
Handtekening

Lêer:Lenin CL Colour.jpg

Wadimir Lenin

Wladimir Iljitsj Lenin (Russies: Владимир Ильич Ленин), regte van Oeljanof (Ульянов), 10 April (Nuwe Styl 22 April) 1870 – 21 Januarie 1924), was ’n rewolusionêr, die stigter van die Bolsjewiste-party, een van die leiers van die Oktober-rewolusie, stigter van die Sowjetunie en die eerste leier van die Russiese Sosialistiese Federale Sowjetrepubliek. Lenin was een van sy rewolusionêre skuilname, waarskynlik ’n verwysing na die rivier Lena.

Hy het op 21 Januarie 1924 in Gorki (by Moskou) gesterf ná ’n aantal beroertes. Sy gebalsemde liggaam is op permanente tentoonstelling in Moskou. Hy is deur Josef Stalin opgevolg as partyleier.

Afkoms

Wladimir Oeljanof is in Simbirsk (tans Oeljanofsk) gebore vir Ilja Nikolajewitsj Oeljanof (1831-1886), ’n bekende skoolinspekteur in Nizjni Nowgorod wat ’n oorerflike adellike titel gekry het vir sy werk in die opvoedkunde, en Maria Aleksandrowna Oeljanowa (gebore Blank).

Lenin was van gemengde afkoms: Russies, Kalmik, Tsjoewasj, Duits, Sweeds en Joods, hoewel laasgenoemde deur sekere historici bevraagteken word.

Jeug

Van 1879 af studeer Lenin aan die Simbirsk-gimnasium, waar hy in 1887 met ’n goue medalje sy skoolloopbaan voltooi. Daarna studeer hy aan die Universiteit van Kazan, maar word gou geskors weens deelname aan studente-onrus. Hy word na familie in die dorpie Kokoesjkino naby Kazan gestuur. Sy ouer broer, Aleksander Oeljanof, word tereggestel nadat hy skuldig bevind is aan poging tot ’n sluipmoord op keiser Aleksander III. Die dood van sy broer het ’n groot invloed op Lenin se latere politieke oortuigings gehad.

In die herfs van 1888 word Lenin toegelaat om terug te keer na Kazan. Hier raak hy betrokke in Marxistiese kringe wat die werke van Karl Marx, Friedrich Engels en ander bestudeer en bespreek. Lenin raak ’n stoere Marxis. In die herfs van 1889 trek die Oeljanof-gesin na Samara, waar Lenin met plaaslike rewolusionêre kontak maak. Hy studeer later aan die Universiteit van Sint Petersburg, waarna hy in 1891 tot die balie toegelaat word.. In 1892 behaal hy ’n eersteklas-graad in regte aan die Universiteit van Sint Petersburg.

Verwysings

Hierdie artikel is merendeels vertaal vanaf die Russiese Wikipedia-artikel [1]