Anthe

Anthe kan hier gesien word naby die mane, Mimas en Pallene. Die sigbare ring aan die linkerkant is die G-ring.

Anthe, oorspronklike voorlopige naam S/2007 S4, is die 60ste natuurlike satelliet van Saturnus. Die maan se ontdekking is op 19 Julie 2007 bekend gemaak, nadat die Cassini-Huygens-tuig op 30 Mei 2007 'n reeks beelde daarvan geneem het.

Die maan het 'n berekende wydte van ongeveer 2km en 'n wentelbaan wat lê tussen dié van die mane Methone en Pallene. Die nabyheid van hierdie maan aan Methone en Pallene kan beteken dat dié mane deel van 'n familie van mane vorm. Die nuwe maan se wentelbaan resoneer met die wentelbaan van Mimas, een van Saturnus se ander mane.

Soos baie van Saturnus se ander mane, word daar gespekuleer dat hierdie maan ook uit rots en ys bestaan.

Bronnelys

• Saturn turns 60. by die Cassini-Huygens webwerf van NASA. Laaste besoek op 20 Julie 2007.
• Saturn's sixtieth moon discovered. by die BBC se nuuswerf. Laaste besoek op 20 Julie 2007.