St. Andrewskerk
Die St. Andrewskerk (ook bekend as die Redbourne-kerk) buite Plettenbergbaai is in 1963 tot nasionale gedenkwaardigheid verklaar.
‘n Gruispad draai wes uit die pad in die Piesangvallei tot by die westelike punt van die gholfbaan van die Plettenberg Bay Country Club. Daar teen die suidelike helling tussen bosse staan hierdie Anglikaanse kerkie. Dit het netjiese plank mure, ‘n fraai voordeur en ‘n opvallende rooigeverfde sinkplaatdak en dit is basies gemeubileerd. Langs die kerk staan ‘n eenvoudige klokkestoel.
In 1850 het William Henry Newdigate (1824-1884) hierdie kerkie op sy plaas Buccleigh as plek van aanbidding vir sy familie en vriende laat bou. Op 3 Oktober 1855 het Biskop Robert Grey van Kaapstad dit ingewy.
In die kerkhof lê verskeie graftes van die Noble- en Tait-families uit die laaste dekades van die 19de eeu. Ook William Henry Newdigate en sy vrou Caroline lê hier begrawe. Caroline was die dogter van kapt. T.H. Duthie en kleindogter van die bekende George Rex van Knysna. Kapt. Duthie het op sy beurt die Belvidere Holy Trinity-kerkie gebou.
Bibliografie[wysig | wysig bron]
- Oberholster, J.J.: Die historiese monumente van Suid-Afrika. Kaapstad: Kultuurstigting Rembrandt van Rijn vir Raad vir Nasionale Gedenkwaardighede, 1972 ISBN 0-620-00191-7