The Man in the Black Suit
"The Man in the Black Suit"
| |
|---|---|
| Skrywer | Stephen King |
| Land | VSA |
| Taal | Engels |
| Genre | Riller |
| Uitgewer | Philtrum Press |
| Uitgegee | 1994 |
"The Man in the Black Suit" is 'n kortverhaalriller deur die Amerikaanse skrywer Stephen King. Dit is oorspronklik op 31 Oktober 1994 in die tydskrif The New Yorker gepubliseer.
In 1995 het dit die World Fantasy Award en die O. Henry-prys gewen vir die beste kortfiksie.[1] In 1997 is dit in die versameling Six Stories gepubliseer.
Volgens King het die verhaal ontwikkel uit een wat 'n vriend aan hom vertel het, waarin die vriend se oupa van aangesig tot aangesig met Satan gekom het in die vorm van 'n gewone man. Dit is in 2004 tot 'n kortrolprent met dieselfde naam verwerk.
Storielyn[wysig | wysig bron]
Die verhaal speel af op die fiktiewe dorp Motton, Maine, en vertel die verhaal van Gary, 'n negejarige seun wie se broer kort tevore van 'n bysteek dood is. Eendag gaan Gary visvang en raak aan die slaap. Toe hy wakker word, sit daar 'n by op die punt van sy neus. Hoewel Gary nie, soos sy broer, allergies vir bysteke is nie, is hy bang. Skielik hoor hy 'n klap en die by is dood. Toe hy omdraai, sien Gary 'n man met skerp oë wat vir hom kyk. Die man het 'n swart driestukpak aan, hy het 'n bleek vel en klouagtige vingers. Toe hy grynslag, ontbloot hy lelike, haaiagtige tande.
Die man vertel vir Gary vreeslike goed: dat sy ma dood is terwyl hy weg was, dat sy pa hom wil molesteer en dat hy (die man) hom gaan eet. Eers glo Gary hom nie. Hy besef egter dit is die duiwel. Om die man te oorreed om hom nie te eet nie, gee Gary hom 'n vis wat hy gevang het, en die man sluk dit heel in. Hy vertel vir Gary hy is steeds honger en Gary ontsnap. Hy hardloop huis toe.
Gary sien sy ma in die kombuis en besef die man het gejok. Sy pa kan sien hy is ontsteld, maar oorreed hom om terug te gaan na die woud om die res van sy hengelgereedskap te gaan haal. Hulle kom by die plek aan waar Gary die man gesien het en sy pa sien die gras is swart waar die man gelê het en daar is 'n snaakse reuk. Gary kan sien sy pa glo hom dat iets snaak gebeur het. Sy pa sê ook vir hom hy moenie weer na die plek teruggaan nie.
Die storie word vertel deur Gary, wat as 'n ouer man op die gebeure terugkyk. Hy word gery deur die geloof dat hy deur blote geluk van die duiwel ontsnap het. Namate die storie na 'n einde toe loop, kom ons agter Gary is bang oor die gedagte aan sy naderende dood en die moontlikheid van 'n tweede ontmoeting met die man in die swart pak. Gary weet hy sal nie op sy ouderdom weer van hom kan wegkom nie.
Kortprentverwerking[wysig | wysig bron]
Die boek is in 2004 tot 'n kortprent verwerk, met die akteur/skrywer en komediant John Viener in die titelrol.[2]
Verwysings[wysig | wysig bron]
- ↑ "The O. Henry Prize - Past Winners List". Random House. Besoek op 9 Maart 2021.
- ↑ The Man in the Black Suit op IMDb
Skakels[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
