Vervoerband

Vervoerbande is installasies waarmee goedere en materiale oor kort afstande vervoer word. Die arbeidsbesparing wat dit meebring, vergoed binne 'n kort tyd vir die oprigtingskoste van die band. Moderne vervoerbande (roltrappe) word ook vir die vervoer van mense in gebouekomplekse gebruik.

Vervoerbande word vir die deurlopende vervoer van goedere gebruik sonder om van byvoorbeeld trollies, waens of ander voertuie gebruik te maak. Dit word veral vir massavervoer (graan, steenkool, sement, ensovoorts) en by verpakkingsaanlêe gebruik. In spesiale gevalle word dit ook vir die vervoer van onderdele in monteringsaanlêe en vir die vervoer van mense gebruik. Die vervoerband bestaan gewoonlik uit 'n aaneenlopende band of 'n band met segmente (rusperband) wat oor rollers beweeg. Die band word aan die kante deur skuinsstaande rollers ondersteun ten einde te voorkom dat iets daaruit val.

Gebruiklike vervoerbande is die volgende:

'n Hyserband, met bakkies daaraan, vir vertikale vervoer.
'n Houerband, wat horisontaal loop maar houers dra wat vertikaal hang.
'n Aaneenlopende band, wat teen 'n helling van tot 35° loop.
'n Rollerbaan, waarby geen band gebruik word nie, maar die goedere op rollers aangeskuif word.
'n Glybaan, wat in werklikheid 'n geut is waarin materiaal afgly.

Bronnelys

Wêreldspektrum, 1982, ISBN 0908409699, volume 28, bl. 136, 137

Eksterne skakels

Wikimedia Commons het meer media in die kategorie Vervoerband.
Wiki oor alle soorte Vervoerbande
Webwerf met inligting oor swaardiens-vervoerbande vir die steenkool- en mynbedryf
Beste vervoerband vervaardigers Geargiveer 17 September 2019 op Wayback Machine